Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 79 Hüküm no: 54 Orijinal metin no: [22b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Beytülmâl emîni Murad Ağa b. Abdürrahim’in beytülmâle ait olduğunu iddia ettiği mülk menzil ve bağın Mustafa Reis b. Abdullah’ın zevcesi Şemse Hâtun bt. Şehâbeddin’e ait olduğunun tespiti Mahmiye-i Galata ve tevâbi‘inde bi’l-fi‘l beytülmâl emîni olan Murad Ağa b. Abdürrahim tarafından mahmiye-i mezbûre ve tevâbi‘inde düşen beytülmâli ahz u kabza vekîl-i sâbitü’l-vekâlesi olan Hüseyin Bey b. Mustafa mahfil-i kazâda bundan akdem mahmiye-i mezbûre tevâbi‘inden kasaba-i Beşiktaş’da vefât eden Mustafa Reis b. Abdullah’ın zevce-i metrûkesi ve vârisesi Şemse Hâtun bt. Şehâbeddin[’i] ihzâr ve mahzarında üzerine takrîr-i da‘vâ edip müteveffâ-yı mezbûrun zâhirde mezbûre Şemse Hâtun’dan gayrı vâris-i ma‘rûfu olmamağın muhallefâtının rub‘u mezbûreye ve selâse-i erbâ‘ı beytülmâle âid olmuşdur. Mezbûre Şemse Hâtun müteveffâ-yı mezbûrun muhallefâtından kasaba-i mezbûrede Sinan Paşa mahallesinde vâki‘ bir tarafı Ferruh Bey b. Abdullah mülkü ve bir tarafı Murad Ağa b. Abdülmennân mülkü ve bir tarafı Mehmed Çelebi b. İbrahim mülkü ve bir tarafı Sefer Çelebi b. İskender mülkü [ile] mahdûd büyût-ı müte‘addideyi müştemil mülk menziline ve kasaba-i merkūme kurbunda Ayazma nâm mevzi‘de vâki‘ etrâf-ı erba‘ası Yani veled-i Halyaz ve İstefan nâm zimmî ve Rada nâm zimmî bağlarıyla ve dere ile mahdûd bağının cemî‘ine vaz‘-ı yed etmişdir. Menzil-i mezbûrdan ve bağdan bi hesâbi’ş-şer‘ kendiye âid olan rub‘ hisse-i şer‘iyyesinin mâ‘adâsından kasr-ı yed edip bana teslîm etmesin vekâletim hasebiyle taleb ederim dedikde gıbbe’s-suâl mezbûre Şemse cevâb verip menzil-i mezbûrun nısfı benim ve nısf-ı âharı zevcim müteveffâ-yı mezbûrun olup mukaddemâ hâl-i hayâtında bin iki târihinde mesfûr Mustafa Reis menzil-i mezbûrda ve bağda olan nısf hissesini yirmi bin akçeye bana bey‘ edip kabz-ı semen ve teslîm-i mebî‘ edip târih-i mezbûrda kasaba-i mezbûrede hilâfete müvellâ olan mevlânâ Mustafa Efendi b. Nezir huzûrunda meclis-i şer‘de i‘tirâf edip mevlânâ-yı mezbûr târih-i merkūm ile müverrah ve mümzâ ve mahtûm yedime hüccet-i şer‘iyye vermişdir deyû hüccet-i mezbûru ibrâz edip nazar olundukda takrîrine mutâbık olup mazmûnuna beyyine taleb olundukda zeylinde isimleri muharrer olan müslümanlardan kasaba-i mezbûre sâkinlerinden Murad Ağa b. Abdülmennân ve Derviş b. Mustafa nâm kimesneler li ecli’ş-şehâde meclis-i şer‘a hâzırân olup istişhâd olundukda fi’l-vâki‘ târih-i mezbûrda merkūm Mustafa Reis hâl-i hayâtında hudûd-ı mezkûre ile mahdûd olan menzil-i mezbûrda ve bağda olan nısf hissesini mezbûre Şemse’ye yirmi bin akçeye bey‘-i bât ile bey‘ edip kabz-ı semen ve teslîm-i mebî‘ ettikden sonra meclis-i şer‘de mevlânâ-yı mezbûr huzûrunda i‘tirâf eyledi, biz bu husûsa şâhidleriz şehâdet dahi ederiz deyû edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın vekîl-i mezbûr mu‘ârazadan men‘ olunup [23a] menzil-i mezbûr ve bağ kemâ kân mezbûre Şemse’nin yedinde ibkā olundu. Hurrire fî evâhiri şehri Rebî‘ilâhir li sene sitte ve ışrîn ve elf Şuhûdü’l-hâl: Mehmed Çelebi b. Şehâbeddin, el-Hâc Ahmed b. Abdullah, Halil Bey b. Hüseyin, Mustafa Bey b. Mustafa, es-Seyyid Mehmed Çelebi b. es-Seyyid Abdullah, Ali Çelebi b. Behram, Memi b. Abdullah, Mustafa b. Mehmed, İbrahim el-Muhzır ve gayruhüm