Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 80 Hüküm no: 55 Orijinal metin no: [23a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şemse Hâtun bt. Şehâbeddin’in vefat eden zevci Mustafa Reis b. Abdülmennân’ın metrûkâtından hissesini beytülmâl emîni Murad Ağa b. Abdürrahim’den aldığı Mahmiye-i Galata müzâfâtından kasaba-i Beşiktaş’da merhûm Sinan Paşa mahallesinde iken vefât eden Mustafa Reis b. Abdülmennân’ın zevce-i metrûkesi ve vârisesi Şemse Hâtun bt. Şehâbeddin mahfil-i şer‘-i şerîfde mahmiye-i mezbûre ve tevâbi‘inde bi’l-fi‘l beytülmâl emîni olan Murad Ağa b. Abdürrahim tarafından mahmiye-i mezbûre ve tevâbi‘inde vâki‘ olan beytülmâli ahz u kabza vekîli sâbitü’l-vekâle olan Hüseyin Bey b. Mustafa muvâcehesinde ikrâr ve takrîr-i kelâm edip zevcim müteveffâ-yı mezbûrun benden gayrı zâhirde vâris-i ma‘rûfu olmamağın muhallefâtının rub‘u bana ve selâse-i erbâ‘ı beytülmâle âid olduğu ecilden muhallefât-ı mahkiyeye mezbûr Hüseyin Bey vâzı‘ü’l-yed olmuşdu. El-hâletü hâzihî zevcim müteveffâ-yı mezbûrun muhallefâtından bana aid rub‘ hisse-i şer‘iyyemi mezbûr Hüseyin Bey’in yedinden bi’t-tamâm alıp kabz eyledim ve ondan mâ‘adâ zevcim müteveffâ-yı mezbûrun zimmetinde mehr-i müeccel-i müsbetem olan üç bin akçe mukābelesinde dahi zevcim müteveffâ-yı mezbûrun terekesinden olan bir re’s kara sığır inek ile bir danayı alıp kabz eyledim, min ba‘d zevcim müteveffâ-yı mezbûrun terekesine müte‘allik mezbûr Murad Ağa ile aslâ da‘vâ ve nizâ‘ım yokdur dedikde gıbbe’t-tasdîki’l-mu‘teber mâ hüve’l-vâki‘ bi’t-taleb sebt olundu. Hurrire fi’t-târihi’l-mezbûr Şuhûdü’l-hâl: Es-Sâbikūn