Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 83 Hüküm no: 59 Orijinal metin no: [24a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden İbrahim Bey b. Mehmed’in Mehmed Çelebi b. Mahmud’a olan borcunun terekesinden ödenmesi Mahmiye-i Galata hâricinde Şahkulu mahallesinde sâkin Mehmed Çelebi b. Mahmud mahfil-i şer‘-i şerîfde medîne-i Hazret-i Eyyûb’da sâkin olup vilâyet-i Rumeli’nde medîne-i Yenişehir’de vefât eden merhûm İbrahim Bey b. Mehmed’in bint-i sulbiyesi Fâtıma nâm sagīrenin cânib-i şer‘den mansûb vasîsi olan Mehmed Efendi b. Hemdem muvâcehesinde üzerine da‘vâ edip bundan akdem merhûm-ı mezbûr İbrahim Bey’e karz tarîkiyle altmış üç bin akçe verip ol dahi vech-i muharrer üzre kabz ve tesellüm edip meblağ-ı mezbûr zimmetinde kalmışdır el-hâletü hâzihî vasiyy-i mezbûrun yedinde olan terekesinden taleb ederim suâl olunsun dedikde gıbbe’s-suâl vasiyy-i mezbûr cevâbında vesâyeti hasebi ile merhûm-ı mezbûrun terekesine vâzı‘ü’l-yed idiğini ikrâr ve vech-i muharrer üzre olan deyni inkâr etmeğin ba‘de talebi’l-beyyine udûl-i müslimînden olup mahalle-i mezbûre sâkinlerinden Mehmed Bey b. Ali ve Mustafa b. Mehmed ve el-Hâc Hasan b. Humeyr nâm kimesneler li ecli’ş-şehâde mahfil-i şer‘a hâzırân olup gıbbe’l-istişhâd fi’l-vâki‘ müdde‘î-i mezbûr Mehmed Çelebi’den merhûm-ı mersûm İbrahim Bey bizim huzûrumuzda karz tarîkiyle altmış üç bin akçe ahz u kabz etti biz bu husûsa bu minvâl üzre şâhidleriz şehâdet dahi ederiz dediklerinde ba‘de’t-ta‘dîl şehâdetleri makbûle oldukdan sonra gıbbe’l-istihlâf mezbûr Mehmed Çelebi’ye da‘vâ eylediği meblağ-ı mârrü’z-zikr altmış üç bin akçeyi merhûm-ı mezbûrdan ahz u kabz etmeyip vechen mine’l-vücûh zimmetini berî etmediğine yemîn teklîf olundukda ol dahi yemîn edip mûcebi ile hükm olundu. Fî evâhiri Cumâdelûlâ [sene 1026] Şuhûdü’l-hâl: Abdi Çelebi b. Ömer el-İmâm, İbrahim Çelebi [b.] Mehmed, el-Hâc Sefer [b.] Abdullah, el-Hâc Receb [b.] Abdullah, Ahmed Çelebi b. Mehmed, Mustafa el-Muhzır, İbrahim el-Muhzır ve gayruhüm