Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 82 Hüküm no: 58 Orijinal metin no: [23b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüsam Reis’in vârisleri Ömer Çelebi b. Cafer Bey ve Âişe Hâtun’un miras hisseleri hakkındaki ihtilafları ve sulh oldukları Mahmiye-i Galata’da İbn-i Yolcu mahallesinde vefât eden merhûm Hüsam Reis’in verâseti mevlâsının oğlu ve usûbet-i nesebiyye cihetinden vârisi olan Ömer Çelebi b. Cafer Bey ve sulbî oğlunun kızı ve usûbe-i nesebiyye cihetinden vârisesi Âişe nâm bikr-i bâliğaya münhasıra oldukdan sonra mezbûr Ömer Çelebi mahfil-i şer‘-i şerîfde mezbûre Âişe Hâtun tarafından husûs-ı âti’z-zikrde vekîl-i sâbitü’l-vekâlesi olan Süleyman Çavuş b. Mehmed mahzarında ikrâr ve takrîr-i kelâm edip merhûm-ı mezbûr Hüsam Reis’in verâseti vech-i muharrer üzre bana ve oğlunun kızı mezbûre Âişe’ye münhasıra olmağın cemî‘-i muhallefâtının nısfı mezbûre Âişe’ye ve nısfı dahi bana âid olmuşdur. El-hâletü hâzihî merhûm-ı mezbûrun hâlâ Dimyat beyi olan emîrü’l-ümerâi’l-kirâm Bayram Bey’in yedinde mevcûde olan muhallefâtından mâ‘adâ mezbûre Âişe yedinde olan muhallefâtından nısf hisse-i şer‘iyyemi taleb eylediğimizde beynimizde müslimûn-i muslihûn tavassut etmekle muhallefât-ı mahkiyeden bana âid olan nısf hisse-i şer‘iyyemi tehârüc-i şer‘î tarîki üzre sekiz bin akçe üzerine [24a] vekîl-i mezbûr ile akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr sekiz bin akçeyi meclis-i sulhda vekîl-i mezbûr Süleyman Çavuş yedinden bi’t-tamâm ahz u kabz eyledim, min ba‘d mezbûr Hüsam Reis’in terekesinden emîr-i müşârün ileyh yedinde mazbût olan muhallefâtdan mâ‘adâ mezbûre Âişe ile aslâ da‘vâ ve nizâ‘ım yokdur, sudûr dahi ederse lede’l-hükkâmi’l-kirâm istimâ‘ olunmaya dedikde gıbbe’t-tasdîki’l-mu‘teber mâ hüve’l-vâki‘ bi’t-taleb sebt olundu. Hurrire fi’t-târihi’l-mezbûr Şuhûdü’l-hâl: Ahmed b. Ramazan el-İmâm, Memi Reis b. Şuca‘, Hasan Efendi b. Ali, Osman b. Halil, Halil Çavuş b. Ömer, İbrahim Çelebi b. Mustafa, Mustafa el-Muhzır ve gayruhüm