Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 84 Hüküm no: 61 Orijinal metin no: [24b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmü’l-veled olan Rus asıllı Gülahmer bt. Abdullah’ın hür olduğunun tescili İşbu sâhibetü’l-kitâb uzun boylu açık kaşlı gök elâ gözlü Gülahmer bt. Abdullah nâm Rûsiyyetü’l-asl câriye mahfil-i şer‘-i şerîfde medîne-i Hazret-i Eyyûb’da Kasımpaşa mahallesinde vefât eden merhûm İbrahim Bey b. Mehmed’in sagīre kızı Fâtıma’nın savb-ı şer‘den vasîsi olup câriye-yi mezbûreye vaz‘-ı yed eden Mehmed Efendi b. Hemdem muvâcehesinde üzerine da‘vâ edip ben merhûm-ı mezbûrun câriye-yi memlûkesi ve ümm-i veledi olup mukaddemâ vefât eden Ahmed nâm veledi benden tevellüd edip ve müslimîn huzûrunda veled-i mezbûr benim oğlumdur deyû ikrâr edip da‘vet etmişdir. Hâlâ mezbûr İbrahim Bey müteveffâ olup ben vech-i muharrer üzre hür olmuşken mezbûr Mehmed Efendi bi’l-vesâye bana mülkiyyet üzre vaz‘-ı yed eder suâl olunup benden kasr-ı yed ettirilmesini taleb ederim deyip gıbbe’s-suâl mezbûr Mehmed Efendi vesâyeti hasebiyle câriye-yi mezbûreye vâzı‘ü’l-yed idiğini ikrâr ve vech-i [25a] muharrer üzre merhûm-ı mezbûrun ümm-i veledi olduğunu inkâr edip ba‘de talebi’l-beyyine udûl-i müslimînden mahalle-i mezbûre sükkânından Mehmed Bey b. Cafer ve Mehmed Çelebi b. Mansur nâm kimesneler li ecli’ş-şehâde mahfil-i şer‘-i şerîfe hâzırân olup ba‘de’l-istişhâd fi’l-vâki‘ câriye-yi mezbûre Gülahmer merhûm-ı mezbûrun İbrahim Bey’in memlûke câriyesi iken mukaddemâ hâl-i hayâtında bizim huzûrumuzda zikr olunan Ahmed benim sulbî oğlumdur, merkūme Gülahmer’den olmuşdur deyû da‘vet etmişdir, biz bu husûsa şâhidleriz şehâdet dahi ederiz deyû edâ-i şehâdet eylediklerinde ba‘de’t-ta‘dîl ve’t-tezkiyye şehâdetleri makbûle olmağın câriye-yi mezbûrenin hürriyetine hükm olundu, vasiyy-i mezbûra kasr-ı yede tenbîh birle mâ hüve’l-vâki‘ bi’t-taleb sebt olundu. Hurrire fî evâili Cumâdelûlâ [sene 1026] Şuhûdü’l-hâl: Ahmed Çelebi b. İbrahim, Abdi Çelebi b. Ömer el-İmâm, Mustafa Bey b. ( ), Ebûbekir b. Resul, Ali Çelebi [b.] İbrahim, Hüseyin Çelebi b. Hasan, Ahmed b. Murad, Mustafa el-Muhzır, İbrahim el-Muhzır ve gayruhüm