Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 89 Hüküm no: 68 Orijinal metin no: [27a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Beşe b. Abdülmennân’ın terekesinden Hacı Abdi b. İbrahim’in alacağının ödenmesi Mahmiye-i Galata tevâbi‘inden Fındıklı’da Selime Hâtun mahallesinde sâkin el-Hâc Abdi b. İbrahim mahfil-i şer‘-i şerîfde yine mahalle-i mezbûrda vefât eden Hasan Beşe b. Abdülmennân’ın sulbî ve sagīr oğulları Mustafa ve Mehmed’in cânib-i şer‘den mansûb vasîleri olan Hanife bt. Abdullah tarafından husûs-ı âti’z-zikrde vekîl olduğu nehc-i şer‘î üzre sâbit olan Murad Ağa b. Abdullah muvâcehesinde üzerine da‘vâ edip bundan akdem müteveffâ-yı mezbûr Hasan Beşe’ye hâl-i hayâtında karz tarîkiyle iki bin akçe verdim, ol dahi vech-i muharrer üzre kabz edip zimmetinde kalmışdır. El-hâletü hâzihî vasiyy-i mezbûrenin yedinde olan terekesinden taleb ederim deyip gıbbe’s-suâl vekîl-i mezbûr müvekkilesinin tereke-i mezbûreye vâzı‘atü’l-yed idiğini ikrâr ve vech-i muharrer üzre olan deyni bi’l-külliyye inkâr etmeğin müdde‘î-i mezbûrdan beyyine taleb olundukda udûl-i müslimînden mahalle-i mezbûre sükkânından el-Hâc Nasuh b. Ramazan ve Mehmed Reis b. Mustafa nâm kimesneler li ecli’ş-şehâde mahfil-i şer‘a hâzırân olup istişhâd olunduklarında fi’l-vâki‘ mezbûr Hasan Beşe hâl-i hayâtında müdde‘î-i mezbûra karz tarîkiyle bizim huzûrumuzda iki bin akçe zimmetimde vâcibü’l-edâ deynim vardır deyû ikrâr eyledi, biz bu husûsa şâhidleriz şehâdet dahi ederiz dediklerinde ba‘de’t-ta‘dîl ve’t-tezkiyye şehâdetleri makbûle oldukdan sonra müdde‘î-i mezbûra da‘vâ eylediği meblağ-ı mezbûru müteveffâ-yı [27b] mezbûrdan hâl-i hayâtında ahz etmeyip vechen mine’l-vücûh zimmetini berî etmediğine yemîn teklîf olundukda ol dahi yemîn-i billâhi’l-aliyyi’l-azîm etmeğin mûcebi ile hükm olundu. Hurrire fî evâhiri Cumâdelâhire li sene sitte ve ışrîn ve elf Şuhûdü’l-hâl: El-Hâc Mustafa [b.] Eyyûb, Mustafa b. Abdullah, Ahmed Beşe Odabaşı, Mehmed Çelebi [b.] Mustafa, Mustafa Çelebi b. Ahmed, İbrahim el-Muhzır ve gayruhüm