Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 90 Hüküm no: 69 Orijinal metin no: [27b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Haydar Reis b. Abdülmennân’ın terekesinden Osman Beşe b. Ahmed’in alacağının ödenmesi Osman Beşe b. Ahmed mahfil-i şer‘de mahmiye-i Galata tevâbi‘inden Fındıklı’da Selime Hâtun mahallesinde vefât eden Haydar Reis b. Abdülmennân’ın bint-i sulbiyesi Sabiha nâm sagīrenin cânib-i şer‘den mansûb vasîsi olan Murad Ağa b. Abdullah muvâcehesinde üzerine takrîr-i da‘vâ edip bundan akdem mezbûr Haydar Reis’e hâl-i hayâtında İskenderiye’de karz tarîkiyle yüz elli aded guruş-ı kebîr verdiğimden mâ‘adâ beynimizde kadri ve vasfı ma‘lûm pirinç dahi bey‘ ve teslîm edip ba‘dehû yedinden meblağ-ı mezbûrdan üç bin beş yüz akçesini alıp ve dahi beynimizde ba‘zı hesâbımız olmağla Akdeniz’de vâki‘ Bodrum cezîresinde beynimizde olan hesâbımız görülüp ba‘de küll-i hesâb mezbûr Haydar Reis zimmetinde on dört bin beş yüz akçe hakkım zuhûr edip meblağ-ı mezbûr on dört bin beş yüz akçeyi İstanbul’da dâyinim olan Sinan Paşa nâm solağa teslîm ile vermişdim. Mezbûr Haydar Reis İstanbul’a vâsıl olmazdan evvel müteveffâ olup meblağ-ı mezbûr zimmetinde kalmışdır, hâlâ vasiyy-i mezbûrun yedinde olan terekesinden taleb ederim deyip gıbbe’s-suâl vasiyy-i mezbûr bi’l-vesâye tereke-i mezbûreye vâzı‘ü’l-yed idiğini ikrâr ve deyn-i mezbûru bi’l-külliyye inkâr etmeğin müdde‘î-i mezbûrdan beyyine taleb olundukda udûl-i ricâlden mahalle-i mezbûrede sâkin Hamza b. Bâli ve İbrahim Çelebi b. Memi Reis nâm kimesneler li ecli’ş-şehâde mahfil-i şer‘a hâzırân olup istişhâd olunduklarında fi’l-vâki‘ zikr olunan cezîrede müteveffâ-yı mezbûrun, mezbûr Osman Beşe ile muhâsebesi görüldükde ba‘de küll-i hesâb müdde‘î-i mezbûra zimmetimde on dört bin beş yüz [28a] akçesi vardır deyû bizim huzûrumuzda ikrâr eyledi, biz bu husûsa şâhidleriz şehâdet dahi ederiz dediklerinde ba‘de’t-ta‘dîl ve’t-tezkiyye şehâdetleri makbûle oldukdan sonra mezbûr Osman Beşe’ye da‘vâ eylediği meblağ-ı mezbûr on dört bin beş yüz akçeyi müteveffâ-yı mezbûrdan hâl-i hayâtında ahz etmeyip vechen mine’l-vücûh zimmetini berî etmediğine yemîn teklîf olundukda ol dahi vech-i muharrer üzre alâ vefki’l-mes’ûl yemîn billâhi’l-aliyyi’l-azîm etmeğin mûcebi ile hükm olundu. Hurrire fî evâhiri Cumâdelâhire [sene 1026] Şuhûdü’l-hâl: El-Hâc Abdi [b.] İbrahim, Mehmed Reis b. Mustafa, el-Hâc Nasuh b. Ramazan, Ahmed Beşe [b.] Abdullah ve gayruhüm