Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 96 Hüküm no: 78 Orijinal metin no: [31a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Hasan Beşe b. Abdullah’ın Osman Çavuş b. Mehmed’e olan borcunun terekesinden ödenmesi Mahmiye-i Galata tevâbi‘inden Fındıklı’da Selime Hâtun mahallesi sâkinlerinden Osman Çavuş b. Mehmed tarafından husûs-ı âti’z-zikrde vekîl olup Mehmed Beşe b. Veli ve Handan b. Abdullah şehâdetleri [ile] vekâleti sâbite olan Hasan b. Abdullah nâm kimesne mahfil-i şer‘de mahalle-i mezbûrede müteveffâ olan merhûm Hasan Beşe b. Abdullah nâm râcilîn sulbî sagīr oğulları Mehmed ve Mustafa’nın vasiyy-i mansûbu olan Hanife bt. Abdullah nâm hâtun tarafından husûs-ı âti’l-beyâna vekîl olduğu nehc-i şer‘î üzre şer‘an sâbit olan Murad Ağa b. Abdullah nâm kimesne muvâcehesinde üzerine takrîr-i da‘vâ edip müteveffâ-yı mezbûr zimmetinde müvekkilem mezbûrun karz-ı şer‘den sekiz bin akçe hakkı vardır, vasiyy-i mezbûrenin yedinde olan terekesinden taleb ederim deyip gıbbe’s-suâl ve akībe’l-inkâr vekîl-i mezbûrdan da‘vâsına mutâbık beyyine taleb olundukda udûl-i müslimînden Mehmed Beşe b. Ahmed ve Mustafa Beşe b. Mehmed nâm kimesneler li ecli’ş-şehâde mahfil-i şer‘a hâzırân olup gıbbe’l-istişhâd fi’l-vâki‘ müvekkil-i mezbûr Osman Çavuş’dan merhûm-ı mezbûr karz tarîki ile bizim huzûrumuzda sekiz bin akçe alıp kabz eyledi, biz bu husûsa şâhidleriz şehâdet dahi ederiz deyû edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle oldukdan sonra vekîl-i mezbûr Osman Çavuş’a da‘vâ eylediği meblağ-ı mersûmu mezbûr Hasan Beşe’den hâl-i hayâtında küllen ve ba‘zan ahz etmeyip vechen mine’l-vücûh zimmetini berî etmediğine yemîn teklîf olundukda ol dahi yemîn edip mûcebi ile hükm olundu. Şuhûdü’l-hâl: Haydar Ağa b. Abdullah, Mustafa [b.] Mehmed, İbrahim [b.] Mustafa ve gayruhüm