Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 97 Hüküm no: 79 Orijinal metin no: [31b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Hasan Beşe b. Abdullah’ın Mehmed Çelebi b. Mustafa’ya olan borcunun terekesinden ödenmesi Mahmiye-i Galata tevâbi‘inden Tophâne’de vâki‘ Sakabaşı mahallesinde sâkin Mehmed Çelebi b. Mustafa nâm râcil mahfil-i kazâya Fındıklı’da Selime Hâtun mahallesinde müteveffâ olan Hasan Beşe b. Abdullah nâm râcilîn sulbî sagīr oğulları Mustafa ve Mehmed’in vasiyy-i mansûbu olan Hanife Hâtun bt. Abdullah’ı ihzâr ve üzerine takrîr-i da‘vâ edip bundan akdem Abaza’ya elli bin akçe sermâyem ile ticâret için sefer ettiğimde mezbûr Hasan Beşe’yi ticâret ahvâlinde vukūfu olmağla hâsıl olan fâideden bir mikdâr akçe vermek üzre bile götürüp gittiğimde mezbûr Hasan Beşe hâsıl olan fâideden bir mikdâr akçe kabz edip ettiği hizmet mukābelesinde makbûlüm oldukdan sonra asıldan ve fâideden bi gayrı vech-i şer‘î on dokuz bin akçe dahi kabz edip meblağ-ı mezbûr on dokuz bin akçenin on bin akçesi dahi hizmeti mukābelesinde makbûlüm olup mâ‘adâsı olan dokuz bin akçeyi muhallefâtından taleb ederim dedikde gıbbe’s-suâl vasiyy-i mezbûre mezbûr Hasan Beşe’nin meblağ-ı mersûm on dokuz bin akçeyi kabz eylediğini inkâr edip müdde‘î-i merkūmdan da‘vâsına mutâbık beyyine taleb olundukda Mustafa Çelebi b. Ahmed el-Yesârî ve Abdünnebi b. Süleyman nâm kimesneler li ecli’ş-şehâde mahfil-i şer‘-i şerîfe hâzırân olup istişhâd olunduklarında fi’l-vâki‘ mezbûr Hasan Beşe hâl-i hayâtında zikr olunan on sekiz bin akçeyi ahz eyledim deyû bizim huzûrumuzda ikrâr eyledi, biz bu husûsa şâhidleriz şehâdet dahi ederiz deyû edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle oldukdan sonra bade’l-yemîni’ş-şer‘iyye mûcebi ile hükm olundu. Fî evâhiri Cumâdelâhire [1026] Şuhûdü’l-hâl: El-Hâc Abdi [b.] İbrahim, el-Hâc Nasuh b. Ramazan, Mehmed Reis b. Mustafa, Ahmed Beşe [b.] Abdullah, Mustafa Beşe [b.] Abdullah, Mustafa el-Muhzır, İbrahim el-Muhzır