Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 103 Hüküm no: 85 Orijinal metin no: [33b-1 Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice adlı çocuğa annesi Kerime Hâtun’un vasî tayin edildiği Udûlden Hüseyin Çelebi b. Sefer ve Haydar Ağa b. Abdullah nâm kimesneler meclis-i şer‘-i şerîfe hâzırân olup husûs-ı âti’z-zikri inkâr eden hasm-ı câhid mahzarında, râfi‘atü hâze’l-kitâb Kerime Hâtun bt. Süleyman’dan sâdır olan da‘vâ-i sahîha-i şer‘iyyede gıbbe’l-istişhâd şöyle şehâdet ettiler ki, hâric-i mahrûse-i Galata mahallâtından el-Hâc Memi mahallesinde sâkin iken bundan akdem vefât eden el-Hâc Haydar b. Abdullah nâm kimesne hâl-i hayâtında zevcesi olan müdde‘iye-i mezbûreyi Hatice nâm sagīre-i sulbiye kızına vasî nasb etti. O da vesâyet-i mezbûreyi kabûl edip hizmet-i lâzımesini edâyı ta‘ahhüd etti. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın mûcebince hükm edildi. Cerâ zâlike ve hurrire fi’l-mezbûr. Şuhûdü’l-hâl: Ahmed Bey b. Mahmud, Mustafa Halîfe b. Mehmed el-İmâm, el-Hâc Süleyman b. Abdullah, Rıdvan b. Abdullah, Mustafa el-Muhzır, İbrahim el-Muhzır ve gayruhüm