Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 124 Hüküm no: 111 Orijinal metin no: [42b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Üftâde Hâtun bt. Abdullah’ın, zevci Rıdvan Reis b. Abdülvehhâb’ın terekesinden mehir alacağı olduğu Mahmiye-i Galata dâhilinde İbn-i Yolcu mahallesinde sâkin olup Karadeniz’de şehîden müteveffâ olan merhûm Rıdvan Reis b. Abdülvehhâb’ın [yukarıda Abdullah’ın] zevce-i metrûkesi ve vârisesi Üftâde Hâtun bt. Abdullah meclis-i şer‘-i şerîfde yine merhûm-ı mezbûrun bint-i sulbiyeleri Râbia ve Sâliha’nın cânib-i şer‘den mansûb vasîleri olan Mustafa Reis b. Abdülmennân [yukarıda Abdullah] muvâcehesinde üzerine takrîr-i da‘vâ edip zevcim merhûm-ı mezbûr zimmetinde mehr-i müeccelimden on bin akçe hakkım vardır vasiyy-i mezbûrun yedinde olan terekesinden taleb ederim deyip gıbbe’s-suâl vasiyy-i mezbûr [43a] cevâbında bi hasebi’l-vesâye tereke-i mezbûreye vâzı‘ü’l-yed olduğunu ikrâr ve deyn-i merkūmu inkâr edip müdde‘iye-i mezbûreden da‘vâsına mutâbık beyyine taleb olundukda udûl-i müslimînden olup mahmiye-i mezbûrede el-Hâc A‘mâ mahallesinde hâlâ imâm olan Sefer Efendi b. Ferhad ve Mehmed b. Ali el-Müezzin ve Hasan b. Abdülmümin el-Kayyım nâm kimesneler li ecli’ş-şehâde meclis-i şer‘-i şerîfe hâzırûn olup gıbbe’l-istişhâd fi’l-vâki‘ mezbûre Üftâde Hâtun merhûm-ı mezbûr Rıdvan Reis’e bizim huzûrumuzda on bin akçe mehr-i müeccel ile akd-i nikâh olunmuşdur, biz bu husûsa şâhidleriz şehâdet dahi ederiz deyû edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle oldukdan sonra mezbûre Üftâde Hâtun hâlâ da‘vâ eylediği meblağ-ı mezbûr on bin akçeyi zevci müteveffâ-yı mezbûrdan hâl-i hayâtında küllen ve ba‘zan ahz etmeyip vechen mine’l-vücûh zimmetini berî etmediğine yemîn teklîf olundukda ol dahi vech-i muharrer üzre yemîn billâhi te‘âlâ etmeğin mûcebi ile hükm olunup mâ hüve’l-vâki‘ bi’t-taleb ketb olundu. Hurrire fi’l-yevmi’s-sâmin ve’l-ışrîn min Şa‘bâni’l-mu‘azzam li sene sitte ve ışrîn ve elf Şuhûdü’l-hâl: El-Hâc Süleyman b. Abdullah, Ahmed Çelebi b. Ali el-Müezzin, Mehmed b. Şükür, Derviş b. Mustafa el-Münâdî, Haydar Ağa b. Abdullah, Mustafa b. Mehmed, İbrahim el-Muhzır ve gayruhüm