Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 125 Hüküm no: 112 Orijinal metin no: [43a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zîba, Mariya, Zamâne ve Kâmile isimli câriyelerin Üftâde Hâtun bt. Abdullah’ın mülkü olduğu Mahmiye-i Galata dâhilinde İbn-i Yolcu mahallesinde sâkin olup Karadeniz’de şehîden müteveffâ olan merhûm Rıdvan Reis b. Abdülvehhâb’ın bint-i sulbiyeleri Râbia ve Sâliha nâm sagīrelerin cânib-i şer‘den mansûb vasîleri olan Mustafa Reis b. Abdülmennân meclis-i şer‘-i şerîfde merhûm-ı mezbûrun zevce-i metrûkesi ve vârisesi olup âti’z-zikr olan câriyelere vâzı‘atü’l-yed olan Üftâde Hâtun bt. Abdullah muvâcehesinde üzerine takrîr-i da‘vâ edip müteveffâ-yı mezbûrun terekesinden olup cümlesi Rûsiyyetü’l-asl altı bin akçe kıymetli Zîba nâm bir câriye ve her biri beşer bin akçe kıymetli Mariya nâm [43b] iki dâye câriye ve altı bin akçe kıymetli Zamâne nâm bir câriye ve dört bin beş yüz akçe kıymetli Kâmile nâm bir câriye bu zikr olunan beş aded Rûsiyyetü’l-asl câriyelerin sümünü mezbûre Üftâde Hâtun’un ve mâ‘adâsı sagīretân-ı mezbûretânın hakları iken mezbûre Üftâde Hâtun’un cümlesine vaz‘-ı yed edip sagīretân-ı mezbûretânın hisselerini vermekden imtinâ‘ eyler, suâl olunup ihkāk-ı hak olunmak matlûbumdur dedikde gıbbe’s-suâl mezbûre Üftâde Hâtun cevâb verip vaz‘-ı yed ettiğim zikr olunan beş aded Rûsiyyetü’l-asl câriyeler benim mülk-i mahzım ve hakk-ı sırfımdır, zevcim merhûm-ı mezbûr müteveffâ olmazdan mukaddem hâl-i hayâtında ve kemâl-i sıhhatinde müslimîn huzûrunda ikrâr edip benim bu zikr olunan câriyelerde vechen mine’l-vücûh alâka ve medhalim yokdur benim için zevcem Üftâde Hâtun’un mülk-i mahzıdır deyip müslimîn huzûrunda ikrâr etmişdir dedikde gıbbe’l-inkâr mezkûre Üftâde Hâtun’dan da‘vâsını mübeyyine beyyine taleb olundukda udûl-i müslimînden mahalle-i mezbûrede hâlâ imâm olan Ahmed Efendi b. Ramazan ve yine mahalle-i mezbûre sükkânından el-Hâc Süleyman b. Abdullah ve Üstâd Mehmed b. Şükrullah ve Mehmed b. Ali el-Müezzin nâm kimesneler li ecli’ş-şehâde meclis-i şer‘-i şerîfe hâzırûn olup gıbbe’l-istişhâd fi’l-vâki‘ merhûm-ı mezbûr Rıdvan Reis hâl-i hayâtında ve kemâl-i sıhhatinde ölmezden bir yıl mukaddem bizi ihzâr edip huzûrumuzda cinsi ve ismi ve kıymetinin zikri sebk eden beş aded câriyeler mezkûre Üftâde Hâtun için zevcem olan Üftâde Hâtun’un mülk-i mahzıdır, aslâ benim mârrü’z-zikr olan câriyelerde alâka ve medhalim yokdur, cümlesi onun mülküdür deyû ikrâr ve i‘tirâf etmişdir biz bu husûsa şâhidleriz şehâdet dahi ederiz deyû edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebi ile hükm olunup mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr Şuhûdü’l-hâl: Mustafa Kapudân b. Abdülmennân, Ahmed Çelebi b. Ali el-Müezzin, İsa Efendi b. Musa el-Müezzin, Haydar Ağa b. Abdullah, Mustafa b. Mehmed el-Muhzır, İbrahim el-Muhzır ve gayruhüm