Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 130 Hüküm no: 119 Orijinal metin no: [46a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nasuh Beşe b. Abdullah’ın evinin beytülmâl tarafından el-Hâc Hasan b. Abdullah’a satıldığı Mahmiye-i İstanbul’da ve Galata’da yeniçeri tâifesi beytülmâl emîni olan fahrü’l-akrân Mehmed Ağa b. Mahmud meclis-i şer‘-i şerîfde işbu râfi‘ü’l-kitâb el-Hâc Hasan b. Abdullah mahzarında ikrâr ve takrîr-i kelâm edip Galata’da el-Hâc A‘mâ mahallesinde târih-i kitâbdan üç buçuk ay mukaddem vefât eden merhûm Nasuh Beşe b. Abdullah nâm râcilîn zâhirde vâris-i ma‘rûfu olmayıp cümle muhallefâtı cânib-i beytülmâle âid olmağın cümle muhallefâtına vâzı‘ü’l-yed olmuşdum. El-hâletü hâzihî vaz‘-ı yed eylediğim muhallefât-ı mahkiyeden olup mahalle-i mezbûrede vâki‘ bir tarafı Sefer Kethüdâ vakfı ile ve bir tarafı Mi‘mâr Yusuf vakfı ve bir tarafı hisar duvarı ve bir tarafı tarîk-i hâs ile mahdûd olup üç tabakayı hâviye tabaka-i ûlâsı iki bâb beyti ve bir hücre ve bir sofayı ve tabaka-i sâniyesi dört bâb beyti ve tabaka-i sâlisesi üç mahzeni ve müşterek bi’r-i mâyı ve bir fırını ve muhavvatayı ve kenîfi ve eşcâr-ı müsmire ve gayr-ı müsmireyi müştemil olan menzil müteveffâ-yı mezbûrun düyûn-ı müsbetesi ve vücûh-ı hayrâta sülüs-i vasiyyeti olup zikr olunan düyûnu edâ ve vasiyyeti tenfîz için müddet-i örfiyye tamâmından sonra sûk-ı sultânîde müzâyede verilip müddet-i medîde mezâd olup rağabât-ı nâs bi’l-külliyye münkatı‘a oldukdan sonra kırk beş bin akçede karâr edip ziyâde ile tâlib-i âhar olmayıp ve mezkûr el-Hâc Hasan bin akçe ziyâde ile iştirâya tâlib olmağla menzil-i mezbûru emânetim hasebi ile merkūm el-Hâc Hasan’a kırk altı bin nakd-i fıddî-i Osmânî akçeye bey‘-i bâtt-ı sahîh-i şer‘î ile bey‘ ve teslîm eyledim, ol dahi vech-i muharrer üzre iştirâ ve tesellüm eyledikden sonra yedinden meblağ-ı mezbûrü’n-na‘tı bi’t-tamâm alıp kabz eyledim bade’l-yevm menzil-i mezbûr merkūm el-Hâc Hasan’ın mülk-i müşterâsıdır keyfe mâ yeşâ’ ve yahtâr mutasarrıf olsun dedikde mukırr-ı mezbûr Mehmed Ağa’nın vech-i muharrer üzre cârî ve sâdır olan ikrârını mezbûr el-Hâc Hasan dahi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb sebt olundu. Hurrire fi’l-yevmi’l-hâdî aşer min Ramazâni’l-mübârek min şühûri sene sitte ve ışrîn ve elf Şuhûdü’l-hâl: Sefer Efendi b. Ferhad el-İmâm bi’l-mahalleti’l-mezbûre, Musli Çelebi b. İbrahim, el-Hâc Süleyman b. Mehmed, el-Hâc Mustafa b. Abdullah, el-Hâc Memi b. Abdullah el-Hayyât, el-Hâc Yusuf b. Abdullah, Haydar Ağa b. Abdullah, Hüseyin b. Abdullah, Mustafa b. Mehmed el-Muhzır, İbrahim el-Muhzır ve gayruhüm