Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 131 Hüküm no: 120 Orijinal metin no: [46b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müteveffâ Mehmed Efendi b. Şaban’ın hayatta iken Eflak asıllı câriyesi Müşerrefe bt. Abdullah’ı azat ettiği İşbu râfi‘atü’l-kitâb orta boylu kara gözlü kara yağız Eflakiyyetü’l-asl Müşerrefe bt. Abdullah meclis-i şer‘-i şerîfde mahmiye-i Galata tevâbi‘inden Kasımpaşa’da Kulaksız mahallesinde vefât eden merhûm Mehmed Efendi b. Şaban’ın zevce-i metrûkesi ve vârisesi Aynî Hâtun bt. Ferhad tarafından husûs-ı âti’z-zikre vekîl olup ber nehc-i şer‘î vekâleti sâbite olan Mahmud Çelebi b. Mustafa mahzarında üzerine da‘vâ edip ben merhûm-ı mezbûrun câriye-i memlûkesi iken hâl-i hayâtında ve kemâl-i sıhhatinde beni i‘tâk edip ben mu‘taka olmuşken müvekkile-i mezbûre bana mülkiyyet üzre vaz‘-ı yed eder suâl olunup kasr-ı yed ettirilmesin taleb ederim dedikde gıbbe’s-suâl vekîl-i mezbûr cevâbında müvekkilesinin câriye-i mezbûreye vâzı‘atü’l-yed idiğini ikrâr ve müdde‘iye-i mezbûrenin vech-i muharrer üzre mu‘taka olduğunu inkâr edip müdde‘iye-i mezbûreden da‘vâsına mutâbık beyyine taleb olundukda udûl-i müslimînden Dîvân-ı âlî kâtiblerinden mefharü’l-küttâb Mehmed Efendi b. Murad ve Yusuf Bey b. Mustafa nâm kimesneler li ecli’ş-şehâde meclis-i şer‘-i şerîfe li ecli’ş-şehâde hâzırân olup gıbbe’l-istişhâd fi’l-vâki‘ merhûm-ı mezbûr Mehmed Efendi hâl-i hayâtında ve kemâl-i sıhhatinde evsâf-ı mezkûre ile muttasıfe olan câriye-i mezbûreyi bizim huzûrumuzda hasbeten lillâhi te‘âlâ i‘tâk ve tahrîr eyledi biz bu husûsa şâhidleriz şehâdet dahi ederiz dediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebi ile hükm olundu. Hurrire fî 18 Ramazân [sene 1026]. Şuhûdü’l-hâl: Mehmed Efendi b. İsa el-İmâm, Ali Çelebi b. ( ), Receb b. ( ) el-Müezzin, Ahmed Çelebi b. Süleyman el-Hatîb, Hızır Beşe b. Pîrî, Mehmed b. Hüseyin, Kurd b. Abdullah er-Râcil, Receb b. Abdullah er-Râcil ve gayruhüm