Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 132 Hüküm no: 121 Orijinal metin no: [46b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müteveffâ Mehmed Efendi b. Şaban’ın hayatta iken Gürcü asıllı Üftâde ve Eflak asıllı Sâliha bt. Abdullah isimli câriyelerini azat ettiği İşbu râfi‘atü’l-kitâb orta boylu açık kaşlı kara gözlü ve burnu üzerinde çiçek alâmeti var Gürciyyetü’l-asl Üftâde ve yine orta boylu açık kaşlı kara yağız yüzünün sağ yanında beni var Eflakiyyetü’l-asl Sâliha bt. Abdullah nâm câriyeler meclis-i şer‘-i şerîfde mahmiye-i Galata tevâbi‘inden Kasımpaşa’da Kulaksız mahallesinde vefât eden merhûm Mehmed Efendi b. Şaban’ın zevce-i metrûkesi ve vârisesi Aynî Hâtun bt. Ferhad tarafından husûs-ı âti’z-zikre vekîl olup ber nehc-i şer‘î vekâleti sâbite olan Mahmud Çelebi b. Mustafa muvâcehesinde üzerine takrîr-i da‘vâ edip bizi mevlâmız merhûm-ı mezbûr [47a] Mehmed Efendi hâl-i hayâtında ve kemâl-i sıhhatinde hasbeten lillâhi te‘âlâ mâlından âzâd ve i‘tâk edip biz mu‘taka olmuşken mezbûre Aynî Hâtun bize mülkiyyet üzre vaz‘-ı yed eder suâl olunup kasr-ı yed ettirilmesin taleb ederiz deyip gıbbe’s-suâl vekîl-i mezbûr müvekkilesinin mezbûrân Üftâde ve Sâliha’ya vâzı‘atü’l-yed idiğini ikrâr ve vech-i muharrer üzre mezbûrânın mu‘taka olduklarını inkâr edip câriye-i mezbûrândan da‘vâlarına mutâbık beyyine taleb olundukda udûl-i müslimînden Dergâh-ı âlî divân kâtiblerinden mefharü’l-küttâb Mehmed Efendi b. Murad ve Yusuf Bey b. Mustafa nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd fi’l-vâki‘ merhûm-ı mezbûr Mehmed Efendi hâl-i hayâtında ve kemâl-i sıhhatinde evsâf-ı mezkûre ile muttasıfe olan mezbûrân Üftâde ve Sâliha’yı hasbeten lillâh mâlından âzâd ve mülkünden ihrâc eyledi biz bu husûsa bu minvâl üzre şâhidleriz şehâdet dahi ederiz deyû edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebi ile ıtklarına hükm olundu. Hurrire fi’t-târihi’l-mezbûr Şuhûdü’l-hâl: Kemâ sebeka