Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 140 Hüküm no: 134 Orijinal metin no: [51a-1 Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nasuh Beşe b. Abdullah’ın hayatta iken malının üçte birini vasiyet ettiği Udûlden Ahmed Çelebi b. Abdüllatif ve el-Hâc Mustafa b. Murad nâm kimesneler meclis-i şer‘-i şerîfe hâzırân olup Kostantıniyye ve mahrûse-i Galata’da vâki‘ râcilîn zümresine mahsûs beytülmâle bi’l-fi‘l emîn olan ve emânet-i mahkiyesi hasebiyle ve hâkim-i şer‘ ma‘rifeti ile dâhil-i Galata mahallâtından el-Hâc A‘mâ mahallesinde bundan akdem vefât eden Nasuh Beşe b. Abdullah nâm yayanın muhallefâtına zâhirde ma‘rûf vârisi zuhûr etmediği için vâzı‘-ı yed olan fahrü’l-ümenâ Mehmed Ağa b. Mahmud nâm hasm-ı câhid mahzarında, râfi‘ü’l-kitâb el-Hâc Mustafa b. Abdullah’dan sâdır olan da‘vâ-i sahîha-i şer‘iyyede gıbbe’l-istişhâd şöyle şehâdet ettiler ki, merhûm-ı mezbûr maraz-ı mevte yakalanıp başını ölüm yastığına koyduğunda ölmeden önce cemî‘ mâlının sülüsünün vesâyet umûru için seçdiği ve hâkim-i şer‘in de münâsib gördüğü diyânetiyle mevsûf bir kimesne yani müdde‘î-i mezbûr yediyle sebîl-i hayrât ve meberrât-ı hasenâta sarf ve turûk-ı birre ve ihsâna bezl edilmesini vasiyyet etti ve vesâyeti üzre musırran vefât eyledi. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın hâkim-i muvakki‘ a‘lâ hâze’l-kitâb şehâdetleri mûcebince vesâyet-i mezbûrenin sıhhatine hükm etti. Vasiyy-i mezbûr sonra emîn-i mezkûr yedinden müteveffâ-yı mezbûrun muhallefâtının sülüsünden on bir bin iki yüz yetmiş akçeyi kabz ve tesellüm eyledi ki bu mikdâr emîn-i mezbûrun sülüs-i mezkûrdan müteveffâ-yı merkūmun iki bin akçe tutan techîz ve telkīn masraflarından sonra bâkī kalan mikdârdır. Cerâ zâlike ve hurrire fi’l-yevmi’l-hâmis aşer min Ramazâni’l-mübârek sene sitte ve ışrîn ve elf. Şuhûdü’l-hâl: Sefer Efendi b. Ferhad el-İmâm, Mehmed Halîfe b. Ali el-Müezzin, Musli Çelebi b. İbrahim, Mahmud Çelebi b. İslâm, el-Hâc Hüseyin b. Yunus, Benli Mehmed el-Münâdî, Mustafa b. Mehmed, İbrahim el-Muhzır ve gayruhüm