Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 141 Hüküm no: 135 Orijinal metin no: [51a-2 Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cerrâh el-Hâc Behram’ın Nasuh Beşe’de ödünçten alacağı olduğu Udûlden el-Hâc Mehmed b. Süleyman ve Derviş b. Mustafa nâm kimesneler meclis-i şer‘-i şerîfe hâzırân olup mahmiye-i Kostantıniyye ve mahrûse-i Galata’da vâki‘ râcilîn zümresine mahsûs beytülmâle bi’l-fi‘l emîn olan ve emânet-i mahkiyesi hasebiyle ve hâkim-i şer‘ ma‘rifeti ile dâhil-i Galata mahallâtından el-Hâc A‘mâ mahallesinde bundan akdem vefât eden merhûm Nasuh Beşe b. Abdullah nâm yayanın muhallefâtına zâhirde ma‘rûf vârisi zuhûr etmediği için vâzı‘-ı yed olan fahrü’l-ümenâ Mehmed Ağa b. Mahmud nâm hasm-ı câhid mahzarında, râfi‘ü’l-kitâb Cerrâh el-Hâc Behram b. Abdullah’dan sâdır olan da‘vâ-i sahîha-i şer‘iyyede gıbbe’l-istişhâd şöyle şehâdet ettiler ki, müdde‘î-i mezbûrun müteveffâ-yı mezkûrun zimmetinde karz-ı şer‘î cihetinden lâzımü’l-edâ ve vâcibü’l-kazâ râyicü’l-vakt iki bin akçe-i Osmânî hakkı vardır. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber oldu. Müdde‘î-i merkūma meblağ-ı mersûmu kendisinden veya vekîlinden kısmen veya tamâmen ahz ü kabz etmediğine ve bi vechin mine’l-vücûh zimmetini ibrâ eylemediğine dâir yemîn billâhi te‘âlâ verildiğinde hâkim-i muvakki‘ a‘lâ hâze’l-kitâb, meblağ-ı mezbûrun müteveffâ-yı merkūmun muhallefâtından müdde‘î-i mezkûra edâsına hükm etti. Müdde‘î-i mezbûr sonra emîn-i merkūm mahzarında, hükm edilen iki bin akçeyi emîn-i mesfûr yedinden ahz ü kabz ettiğini ikrâr etti. Emîn-i mezbûr, mukırr-ı merkūmun ikrâr-ı meşrûhunu vicâhen ve şifâhen tasdîk eyledi. Hurrire fi’t-târihi’l-mezbûr. Şuhûdü’l-hâl: Kemâ sebeka