Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 143 Hüküm no: 140 Orijinal metin no: [52a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Merhûm Memi Paşa b. Abdullah’ın forsalarını oğlu İbrahim Bey’in satın aldığı Bundan akdem Karadeniz’de şehîden vefât eden merhûm Memi Paşa b. Abdullah nâm müteveffânın sulbî sagīr oğulları ve vârisleri olan İsmail’in ve Halil’in ve Mehmed Ali’nin kıbel-i şer‘-i şerîfden mansûb vasîleri ve vâlideleri Âişe Hâtun bt. Üveys meclis-i şer‘-i şerîfde müteveffâ-yı mezbûrun sulbî kebîr oğlu İbrahim Bey mahzarında ikrâr ve takrîr-i kelâm edip mezbûrûn İsmail ve Halil ve Mehmed Ali’ye babaları merhûm-ı mezbûrdan intikāl eden memlûk forsa keferesinden beynimizde evsâfı ve eşkâli ve esmâsı ma‘lûm kırk üç nefer Rûsiyyü’l-asl ve yirmi nefer Boğdaniyyü’l-asl ve on altı nefer Macariyyü’l-asl ve on nefer Nemçeviyyü’l-asl memlûkları her biri yedişer bin akçeye olmak üzre ve bir nefer Nemçeviyyü’l-asl beş bin sekiz yüz on altı akçeye olmak üzre cem‘an zikr olunan doksan iki nefer forsa-i memlûkü safka-i vâhide ve bey‘-i bâtt-ı sahîh-i şer‘î ile merkūm İbrahim Bey altı yüz bin ve kırk iki bin sekiz yüz on altı akçe fıddî-i Osmânî akçeye eytâm-ı mezbûreye enfa‘ olmağla bey‘ ve teslîm edip ol dahi vech-i muharrer üzre iştirâ ve tesellüm edip semen-i mezbûrü’n-na‘t zimmetinde eytâm-ı mezbûreye vâcibü’l-edâ deynidir, eytâm-ı mezbûrenin beynimizde kadri ve vasfı ma‘lûm çuka bahâsından dahi mezbûr İbrahim Bey zimmetinde üç bin beş yüz akçe olup meblağ-ı mezbûr dahi eytâm-ı mezbûreye vâcibü’l-edâ deyndir dedikde vasiyy-i mezbûrenin vech-i muharrer üzre cârî olan ikrârını merkūm İbrahim Bey dahi bi’l-muvâcehe tasdîk edip mâ vaka‘a bi’t-taleb ketb olundu. Hurrire fî evâili Recebi’l-mürecceb li sene sitte ve ışrîn ve elf Şuhûdü’l-hâl: Ali Ağa b. Abdullah ez-Zevvâk, Şaban Kapudân b. Abdullah, Mustafa Reis b. Abdullah, Mustafa Kapudân b. Abdullah, Ramazan Ağa b. Abdullah, Mustafa Çelebi b. Ramazan, Mehmed Çavuş b. Ahmed, Ali Râmi b. Abdurrahman, Mehmed Kethüdâ-yı sefîne ve gayruhüm