Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 154 Hüküm no: 145 Orijinal metin no: [56b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Merhûm Süleyman Bey b. Abdülmennân’ın oğlu Abdülkâdir Bey’in vasîsi Murad Kethüdâ’nın terekesinden alacağı kalmadığı Mahmiye-i Galata tevâbi‘inden kasaba-i Beşiktaş’da merhûm Sinan Paşa mahallesinde sâkin iken mukaddemâ vefât eden merhûm Süleyman Bey b. Abdülmennân’ın sulbî oğlu olup sin ve cüssesinin bülûğa tahammülü olduğu hâlde bülûğuna mu‘terif olan Abdülkādir Bey b. el-merhûm Süleyman Bey mahfil-i şer‘-i şerîfde yine mahalle-i mezbûrede sâkin iken vefât eden merhûm Murad Kethüdâ b. Abdülvehhâb’ın sulbiye ve kebîre kızı Fâtıma nâm hâtun tarafından zevci ve husûs-ı âti’z-zikrde vekîli olup nehc-i şer‘î üzre vekâleti sâbite olan Hasan Çelebi b. Keyvan muvâcehesinde ikrâr ve takrîr-i kelâm edip müvekkile-i mezbûre Fâtıma Hâtun’un babası merhûm-ı mezbûr Murad Kethüdâ benim vasiyy-i muhtârım olmağla babam merhûm-ı mezbûrdan bana intikāl eden iki kere yüz bin ve altmış beş bin beş yüz on iki akçe hisse-i şer‘iyyemi ve ba‘dehû vefât eden karındaşım Rukiye’den dahi bana âid olan otuz altı bin sekiz yüz yetmiş altı akçe hakkımı ki cem‘an kassâm-ı askerî tahrîr eylediği defter mûcebince üç kere yüz bin ve iki bin üç yüz seksen sekiz akçe hakkımı bi’l-vesâye ahz u kabz eylemişdi. El-hâletü hâzihî merhûm-ı mezbûr Murad Kethüdâ vefât etmeğin vârisesi ve kebîre kızı mezbûre Fâtıma Hâtun’un zevci ve vekîli olan mersûm Hasan Çelebi yedinden babam merhûm-ı mezbûrdan ve ba‘dehû vefât eden kız karındaşım Rukiye’den bana âid olan hisse-i şer‘iyye-i mu‘ayyenem olan meblağ-ı mârrü’z-zikr üç kere yüz bin akçe ve iki bin üç yüz seksen sekiz akçeyi bi’t-tamâm ve’l-kemâl alıp kabz eyledim, min ba‘d vasiyy-i muhtârım olan merhûm Murad Kethüdâ terekesinde bir akçe ve bir habbe hakkım bâkī kalmadı dedikde mukırr-ı merkūm Abdülkādir Bey’in vech-i muharrer üzre cârî ve sâdır olan ikrârını vekîl-i mersûm Hasan Çelebi dahi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ alâ vukū‘ihi bi’t-taleb sebt olundu. Hurrire fî evâsıtı Muharremi’l-haram li sene sitte ve ışrîn ve elf. Şuhûdü’l-hâl: Es-Sâbikūn Bu iki hüccete tamâm olan sicilde kayda yer olunmadığı ecilden buraya kayd olunmuşdur.