Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 153 Hüküm no: 144 Orijinal metin no: [56a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Merhûm Süleyman Bey b. Abdülvehhâb’ın çocuklarının vasîsi Murad Kethüdâ’nın vefatı üzerine Mehmed Bey’in vasî tayin edildiği Mahmiye-i Galata tevâbi‘inden kasaba-i Beşiktaş’da merhûm Kapudân Sinan Paşa mahallesinde sâkin iken mukaddemâ vefât eden merhûm Süleyman Bey b. Abdülvehhâb’ın sulbî ve sagīr oğlu Abdullah ile sulbiye ve sagīre kızı Âişe’nin kıbel-i şer‘den mansûb vasîleri ve büyük karındaşları fahrü’l-akrân Mehmed Bey b. el-merhûm Süleyman Bey mahfil-i şer‘-i şerîfde yine mahalle-i mezbûrede sâkin iken vefât eden merhûm Murad Kethüdâ b. Abdülmennân’ın bint-i sulbiyesi Fâtıma nâm hâtun tarafından zevci ve husûs-ı âti’z-zikrde vekîli olup nehc-i şer‘î üzre vekâleti sâbite olan umdetü’l-a‘yân Hasan Çelebi b. Keyvan muvâcehesinde ikrâr ve takrîr-i kelâm edip müvekkile-i mezbûre Fâtıma’nın babası merhûm-ı merkūm Murad Kethüdâ vasîleri olduğum sagīrân-ı mezbûrânın vasiyy-i muhtârları olduğu cihetden mezbûrân Abdullah ile Âişe’ye babaları merhûm-ı mersûm Süleyman Bey’den intikāl edip ol zamânda kassâm-ı askerî olan Efendi tahrîr eylediği defter mûcebince li’z-zekeri mislü hazzi’l-ünseyeyn sagīrân-ı mezbûrânın hisse-i şer‘iyyeleri olan üç kere yüz bin ve doksan sekiz bin iki yüz altmış sekiz akçe haklarını ve ba‘dehû vefât eden kız karındaşları Rukiye’den dahi sagīrân-ı mezbûrâna intikāl edip kezâlik defter-i mezbûrda tahrîr olunduğu üzre li’z-zekeri mislü hazzi’l-ünseyeyn hisse-i şer‘iyyeleri olan elli beş bin üç yüz on dört akçe hisselerini ki cem‘an bi’l-vesâye sagīrân-ı mezbûrâna babaları merhûm-ı mezbûrdan ve kız karındaşlarından intikāl eden dört kere yüz bin ve elli üç bin beş yüz seksen iki akçe haklarını alıp kabz eylemişdi. El-hâletü hâzihî mezbûr Murad Kethüdâ vefât edip ben sagīrân-ı mezbûrâna cânib-i şer‘den vasî nasb olunmağla merhûm-ı mezbûr Murad Kethüdâ yedinde olup sagīrân-ı mezbûrânın hisse-i şer‘iyyeleri olan meblağ-ı mârrü’z-zikr dört kere yüz bin ve elli üç bin beş yüz seksen iki akçe hisse-i şer‘iyyelerini vekîl-i mezbûr Hasan Çelebi’nin yedinden alıp kabz eyledim, min ba‘d merhûm-ı mezbûr Murad Kethüdâ’nın terekesinde defter-i mersûm nâtık olduğu üzre sagīrân-ı mezbûrânın hisse-i şer‘iyyelerinden bir akçe bâkī kalmadı bi’t-tamâm bi’l-vesâye alıp kabz eyledim dedikde mersûm Mehmed Bey’in vech-i muharrer ve meşrûh üzre bi’l-vesâye cârî olan ikrârını vekîl-i mezbûr Hasan Çelebi dahi bi’l-muvâcehe tasdîk ve bi’l-müşâfehe tahkīk [56b] eyledikden sonra mâ hüve’l-vâki‘ bi’t-taleb li ecli’t-temessük sebt olundu. Hurrire fî evâsıtı [Rebî‘ilâhir] li sene sitte ve ışrîn ve elf Şuhûdü’l-hâl: El-Hâc Murad b. Abdullah, Mahmud Ağa b. Abdullah, Hayreddin Reis [b.] Osman, Haydar Ağa [b.] Abdullah, Memi Ağa b. Abdullah, Mustafa [b.] Kılıç, Mustafa Çelebi b. Hüseyin, Ramazan Çelebi b. Hüseyin, Pîrî Çelebi b. Hüseyin, Ramazan Ağa [b.] Abdullah, es-Seyyid Mahmud b. Abdullah, el-Hâc Rıdvan [b.] Abdullah, Murad Reis [b.] Abdullah, Ali Ağa [b.] Abdullah, Mustafa el-Muhzır