Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 158 Hüküm no: 150 Orijinal metin no: [58b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rıdvan Reis b. Abdülmennân’ın terekesinden hanımının kendisine düşen hisseyi aldığı ve sulh olduğu Mahmiye-i Galata’da İbniyolcu mahallesinde sâkin iken Karadeniz’de şehîden vefât eden merhûm Rıdvan Reis b. Abdülmennân’ın verâseti zevce-i metrûkesi ve vârisesi Üftâde bt. Abdullah nâm hâtun’a ve bint-i sulbiyeleri Râbia ve Sâliha’ya ve mu‘takının sulbî oğlu ve vâris-i vâhidi Beyzâde Mehmed Çelebi’ye münhasıra oldukdan sonra mezbûr Mehmed Çelebi meclis-i şer‘-i şerîfde sagīretân-ı mezbûretânın cânib-i şer‘-i şerîfden mansûb vasîleri olup ve merkūme Üftâde Hâtun tarafından husûs-ı âti’z-zikre vekîl olduğu ber nehc-i şer‘î sâbit olan Mustafa Reis b. Abdullah muvâcehesinde ikrâr ve takrîr-i kelâm edip mezbûr Rıdvan Reis’in terekesinden olup lede’l-ahâlî ve’l-cîrân ma‘lûmü’l-hudûd olup mahalle-i mezbûrede vâki‘ menzilinden ve sâir cümle terekesinden bana âid ve râci‘ olan cümle hisse-i şer‘iyyemden şerâit-i şer‘iyyesini hâvî sulh-ı tehârüc ile on beş bin akçeye vekîl-i mezbûr ile sulh oldum ve bedel-i sulh olan meblağ-ı mezbûr on beş bin akçeyi vekîl-i mezbûr yedinden meclis-i sulhda bi’t-tamâm alıp kabz eyledim, ba‘de’l-yevm mezbûr Rıdvan Reis terekesinde olan hisseme müte‘allik zikr olunan verese ile aslâ da‘vâ ve nizâ‘ım yokdur da‘vâ dahi edersem lede’l-hükkâm istimâ‘ olunmaya dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Hurrire fî 28 Ramazân sene 1026 Şuhûdü’l-hâl: Hızır Efendi b. Receb el-İmâm, Ahmed Efendi b. Ramazan el-İmâm, İsa Halîfe b. Musa el-Müezzin, el-Hâc Süleyman b. Abdullah, Musli Çelebi b. Abdullah, Mustafa Kapudân [b.] Abdullah, Hüseyin Çelebi b. Mustafa, Musli Çelebi b. İbrahim ve gayruhüm Sahh