Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 42 Hüküm no: 6 Orijinal metin no: [3a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine Hâtun bt. Hüseyin’in kocasının muhallefâtından hissesini almış olduğu Kasaba-i Tophâne mahallâtından Ebülfazl mahallesi sâkinlerinden olup tarîk-i hacda vefât eden el-Hâc Ali b. Rüstem nâm müteveffânın zevce-i metrûkesi Emine Hâtun bt. Hüseyin meclis-i şer‘de müteveffâ-yı mezbûrun sagīre sulbiye kızı Râbia’nın kıbel-i şer‘den mansûb vasiyy-i şer‘îsi fahrü’l-müderrisîn Ali Efendi b. Şaban mahzarında ikrâr ve takrîr-i kelâm edip müteveffâ-yı mezbûrun muhallefâtından bi hasebi’l-irsi’ş-şer‘î bana intikāl eden sümün hisse-i şer‘iyyemden ve mehr-i müsbetem olan kırk bin akçe hakkımdan vasiyy-i merkūm Ali Efendi yedinden elli beş bin akçe alıp kabz edip makbûzum mertebesine temessük verilsin dedikde merkūm Ali Efendi dahi bi’l-muvâcehe tasdîk ve tahkīk ettikden sonra işbu hurûf gıbbe’t-taleb ketb olunup yedine vaz‘ ve def‘ olundu, inde’l-ihtiyâc ihticâc edeler. Tahrîren fi’l-yevmi’s-sâbi‘ aşer min şehri Rebî‘ilûlâ li sene ihdâ ve hamsîn ve elf. Şuhûdü’l-hâl: Ali Çavuş b. İbrahim, Mehmed Beşe b. Mustafa, Kenan b. Abdullah, Mustafa b. Mehmed, Mahmud b. İlyas ve gayruhüm.