Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 42 Hüküm no: 7 Orijinal metin no: [3b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Derviş’in amcasının muhallefâtından hissesini almış olduğu Kasaba-i Tophâne mahallâtından Ebülfazl mahallesi sâkinlerinden tarîk-i hacda vefât eden el-Hâ[c] Ali b. Rüstem nâm müteveffânın vârisi karındaşı oğlu Mustafa b. Derviş meclis-i şer‘de müteveffâ-yı mezbûrun sagīre sulbiye kızı Râbia’nın kıbel-i şer‘den mansûb vasiyy-i şer‘îsi olup vesâyeti hasebiyle müteveffâ-yı mezbûrun muhallefâtına vâzı‘ü’l-yed olan fahrü’l-müderrisîn Ali Efendi b. Şaban mahzarında ikrâr ve takrîr-i kelâm edip müteveffâ-yı mezbûrun muhallefâtından bi hasebi’l-irsi’ş-şer‘î bana intikāl eden hisse-i şer‘iyyem ber mûceb-i defter-i kassâm yetmiş sekiz bin dört yüz doksan beş akçe olup vasiyy-i merkūm Ali Efendi yedinden meblağ-ı mezbûr yetmiş sekiz bin dört yüz doksan beş akçe hisse-i şer‘iyyemi bi’t-tamâm alıp kabz eyledim dedikde gıbbe’t-tasdîk işbu hurûf bi’t-taleb ketb olundu. Cerâ zâlike ve hurrire fi’l-yevmi’s-sâbi‘ aşer min şehri Rebî‘ilevvel li sene ihdâ ve hamsîn ve elf. Şuhûdü’l-hâl: Ali Halîfe b. Mustafa, Ali Çavuş b. İbrahim, Mehmed Beşe b. Mustafa, Kenan b. Abdullah, Mustafa b. Mehmed, Mahmud b. İlyas ve gayruhüm.