Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 43 Hüküm no: 8 Orijinal metin no: [3b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine Hâtun’un mehir alacağı olduğu Udûlden Seyyid Hüseyin b. Seyyid İbrahim ve Mehmed b. Musa nâm kimesneler meclis-i şer‘-i şerîf ve mahfil-i dîn-i münîf el-masûn ani’t-tağyîr ve’t-tahrîfe hâzırân olup hâl-i hayâtında mahmiye-i Galata tevâbi‘inden Tophâne kasabası mahallâtından Ebu’l-fazl mahallesinde sâkin iken bundan akdem tarîk-i hacda vefât eden el-Hâc Ali b. Rüstem’in Râbia nâm sagīre kızına kıbel-i şer‘den mansûb vasî olan ve müteveffâ-yı mezbûrun muhallefâtına vâzı‘ü’l-yed bulunan Ali Efendi b. Şaban nâm husûs-ı âti’z-zikri münkir hasm-ı câhid mahzarında müteveffâ-yı mezbûrun zevce-i metrûkesi ve vârisi, sâhibe-i hâze’l-kitâb Emine Hâtun bt. Hüseyin Subaşı’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müdde‘iye-i merkūmenin, müteveffâ-yı mezbûrun zimmetinde nikâhında ma‘kūdun aleyh olan mehr-i müecceli cihetinden râyicü’l-vakt kırk bin akçe hakkı vardır. Müdde‘iye-i mezbûreye meblağ-ı merkūmu sağlığında müteveffâ-yı mezkûrun kendisinden veya vekîlinden kısmen veya tamâmen almadığına, kendisine hibe etmediğine, bi vechin mine’l-vücûh ve bi sebebin mine’l-esbâb zimmetini ibrâ etmediğine dâir yemîn billâh verildiğinde ve şâhidlerin şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olduğunda hâkim-i muvakki‘ a‘lâhu şehâdetleri mûcebince meblağ-ı mezbûrun müteveffâ-yı mezkûrun muhallefâtından müdde‘iye-i merkūmeye edâsına hükm etti. Cerâ zâlike ve hurrire fî evâhiri şehri Rebî‘ilevvel sene ihdâ ve hamsîn ve elf min hicreti men lehü’l-ızzü ve’ş-şeref. Şuhûdü’l-hâl: Ali Çavuş b. İbrahim, Mehmed Beşe b. Mustafa, Kenan b. Abdullah, Mustafa b. Mehmed, Mahmud b. İlyas ve gayruhüm mine’l-hâzırîn.