Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 44 Hüküm no: 11 Orijinal metin no: [4a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Beytülmâl emini Kasım Ağa b. İsmail’in Belkıs Hâtun bt. Abdullah’a muârazadan men olunduğu Bi’l-fi‘l zümre-i râcilîne emîn olan fahrü’l-akrân Kasım Ağa b. İsmail meclis-i şer‘de mahmiye-i Galata’da Bereketzâde mahallesi sâkinelerinden Belkıs Hâtun bt. Abdullah mahzarında üzerine da‘vâ ve takrîr-i kelâm edip merkūme Belkıs Hâtun’un zevci Mustafa Beşe b. Ahmed fevt olup muhallefâtının rub‘u zevcesi mezbûre Belkıs Hâtun’a ve selâse-i erbâ‘ı beytülmâle âid olup müteveffâ-yı mezbûrun muhallefâtından iki samur kürk ve bir kîse riyâlî guruş merkūme Belkıs Hâtun hıfz etmişdir suâl olunup bi hasebi’ş-şer‘i’ş-şerîf eşyâ-i mezbûrenin selâse-i erbâ‘ı cânib-i beytülmâle âid olmağın alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrun müdde‘âsını [4b] mübeyyin beyyine taleb olundukda ityân-ı beyyineden izhâr-ı acz edip merkūme Belkıs Hâtun’a eşyâ-i mezkûreyi saklamadığına ve saklatmadığına yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-azîm ettikden sonra emîn-i merkūm mu‘ârazadan men‘ birle mâ hüve’l-vâki‘ bi’t-taleb ketb olundu. Cerâ zâlike ve hurrire fi’l-yevmi’s-sâlis min şehri Rebî‘ilevvel li sene ihdâ ve hamsîn ve elf. Şuhûdü’l-hâl: Es-Seyyid Mehmed Çelebi b. İbrahim, Hüseyin Çelebi b. Sefer, Ahmed Ağa b. Ali, Bâli b. Mehmed, Mustafa Çelebi b. Mehmed, Receb Efendi b. ( ) el-Müezzin, Mahmud b. İlyas, Mustafa b. Mehmed ve gayruhüm mine’l-hâzırîn.