Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 45 Hüküm no: 12 Orijinal metin no: [4b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Beşe b. Ahmed’in muhallefâtından olup hanımı Belkıs bt. Abdullah ile beytülmâle intikal eden evin Hasan Çelebi b. Derviş Efendi’ye satılması Mahmiye-i Galata dâhilinde Bereketzâde mahallesi sâkinlerinden olup tarîk-i hacc-ı şerîfde vefât eden ve zevce-i metrûkesi Belkıs bt. Abdullah nâm hâtundan gayrı zâhirde vâris-i ma‘rûfu olmamağla muhallefâtının selâse-i erbâ‘ı cânib-i beytülmâle âid olan Mustafa Beşe b. Ahmed nâm râcilin mahalle-i mezbûrede vâki‘ hudûdunun bir tarafı Hasan Çelebi b. Derviş Efendi mülküne ve bir tarafı hisar duvarına ve bir tarafı tarîk-i âma ve bir tarafı tarîk-i hâssa müntehî olan mülk menzilin rub‘u irs-i şer‘îyle zevce-i metrûkesi mezbûre Belkıs Hâtun’a intikāl edip ve selâse-i erbâ‘ı cânib-i beytülmâle âid ve râci‘ olduğu mütehakkik oldukdan sonra mezbûre Belkıs Hâtun ve mahrûse-i İstanbul ve mahmiye-i mezbûre ve tevâbi‘inde vâki‘ zümre-i râcilîne beytülmâl emîni olan fahrü’l-emâsil ve’l-ekârim Kasım Ağa b. İsmail nâm kimesne ile ma‘an meclis-i şer‘-i şerîf-i lâzimü’t-teşrîfe gelip işbu hâfızü hâze’l-kitâb fahrü’l-akrân Hasan Çelebi b. Derviş Efendi mahzarında her biri ikrâr ve takrîr-i kelâm eylediler ki menzil-i mezkûr bey‘a arz olunup sûk-ı sultânîde kirâren ve mirâren müzâyede olunup rağabât-ı nâs bi’l-külliye münkatı‘a oldukda mezbûr Hasan Çelebi üzerinde seksen beş bin akçede karâr edip ziyâde ile âhar tâlibi olmamağın menzil-i mezkûru merkūm Hasan Çelebi’ye mezbûrü’l-mikdâr seksen beş bin nakd-i râyic fi’l-vakt akçeye bey‘-i bâtt-ı kat‘î ile bey‘ edip mezbûre Belkıs menzil-i mezkûrun semeni olan seksen beş bin akçenin rub‘u olan yirmi bir bin iki yüz elli akçesini benim hisse-i şerî‘a-i şâyi‘am için merkūm Hasan Çelebi yedinden ahz ü kabz eyledim ve mûmâ-ileyh Kasım Ağa dahi semen-i merkūmun selâse-i erbâ‘ı olan altmış üç bin yedi yüz elli akçesini emânet-i mahkiyem hasebiyle mersûm Hasan Çelebi yedinden ahz ü kabz eyledim dediklerinden sonra teslîm-i mebî‘ eyledik, ba‘de’l-yevm menzil-i mezkûr merkūm Hasan Çelebi’nin mülk-i müşterâsıdır, keyfe mâ yeşâ’ ve yahtâr mutasarrıf olsun dediklerinde mukırrân-ı mezbûrânın vech-i muharrer üzere cârî olan ikrârlarını el-mukarrun lehü’l-merkūm Hasan Çelebi bi’l-muvâcehe tasdîk ve bi’l-müşâfehe tahkīk eylemeğin mâ hüve’l-vâki‘ bi’t-taleb ketb olundu. Tahrîren fî evâhiri şehri Rebî‘ilevvel li sene ihdâ ve hamsîn ve elf. Şuhûdü’l-hâl: Mehmed Efendi b. Ali el-İmâm, Hasan Çelebi b. Sefer, Ahmed Çelebi b. İshak, Ahmed Ağa b. Ali, Ahmed Efendi b. Süleyman el-Kâtib, Ali Efendi b. Mustafa ve gayruhüm mine’l-hâzırîn.