Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 50 Hüküm no: 17 Orijinal metin no: [6b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belkıs Hâtun bt. Abdullah’ın miras hissesini Abdünnebi b. Nesimi’ye satması Mahmiye-i Galata mahallâtından Şehsuvar mahallesinde sâkin iken vefât eden merhûm el-Hâc Mustafa b. Süleyman’ın verâseti sulbiye kızı Hatice Hâtun’a ve zevce-i metrûkesi Belkıs Hâtun bt. Abdullah ve ammisi oğlu Abdünnebi b. Nesimi’ye münhasıra oldukdan sonra merkūme Belkıs Hâtun meclis-i şer‘de bâ‘isü’l-kitâb merkūm Abdünnebi mahzarında ikrâr ve takrîr-i kelâm edip müteveffâ-yı mezbûrun mahalle-i mezbûrda vâki‘ bir tarafı cidâr-ı hısna ve bir tarafı el-Hâc Yusuf mülküne ve bir tarafı el-Hâc Perviz mülküne ve taraf-ı âharı tarîk-i âm ile mahdûd olan büyût-ı müte‘addide ve gayr-ı müte‘addide ve önünde olan arsa-i hâliyesi sekiz sehime münkasım olup bi hasebi’l-irsi’ş-şer‘î benim hisse-i mu‘ayyenem olan bir sehim mezbûr Abdünnebi’ye dört bin iki yüz nakd-i râyic fi’l-vakt akçeye bey‘-i kat‘î ile bey‘ ve semeni olan meblağ-ı mezbûr dört bin iki yüz akçeyi müşterî-i merkūm Abdünnebi yedinden bi’t-tamâm alıp kabz eyledim ba‘de’l-yevm mülk-i müşterâsıdır, keyfe mâ yeşâ’ mutasarrıf olsun dedikde mukırr-ı mezbûrenin minvâl-i meşrûh üzere sâdıra olan ikrârın merkūm Abdünnebi bi’l-muvâcehe tasdîk ve tahkīk ettikden sonra işbu hurûf gıbbe’t-taleb ketb olunup yed-i tâlibe vaz‘ ve def‘ olundu, inde’l-ihtiyâc ihticâc edeler. Tahrîren fi’l-yevmi’s-sânî ve’l-ışrîn min şehri Rebî‘ilâhir li sene ihdâ ve hamsîn ve elf min hicretin men lehü’l-izzü ve’ş-şeref. Şuhûdü’l-hâl: Mehmed Efendi b. Ali el-İmâm, Ali Efendi b. Hamza el-İmâm, el-Hâc Ali b. Kasım, Mehmed Çelebi b. Mustafa, Mustafa b. Derviş, Ali Beşe b. Abdullah, Ali b. Receb ve gayruhüm mine’l-hâzırîn.