Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 49 Hüküm no: 16 Orijinal metin no: [6a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belkıs Hâtun bt. Abdullah’ın Abdünnebi b. Nesimi’ye miras hissesini vermiş olduğu Mahmiye-i Galata mahallâtından Şehsuvar mahallesinde sâkin iken vefât eden el-Hâc Mustafa b. Süleyman’ın verâseti sulbiye kızı Hatice Hâtun’a ve zevce-i metrûkesi Belkıs Hâtun bt. Abdullah ve ammisi oğlu Abdünnebi b. Nesimi’ye münhasıra oldukdan sonra müteveffâ-yı mezbûrun terekesine vâzı‘atü’l-yed olan merkūme Belkıs Hâtun meclis-i şer‘de bâ‘isü’l-kitâb merkūm Abdünnebi mahzarında takrîr-i kelâm edip müteveffâ-yı mezbûrun mahalle-i mezbûrda vâki‘ bir tarafı cidâr-ı hısn ve bir tarafı el-Hâc Yusuf mülküne ve bir tarafı el-Hâc Perviz mülküne ve taraf-ı âharı tarîk-i âm ile mahdûd olan mülk menzilde merkūm Abdünnebi’nin bi hasebi’l-irsi’ş-şer‘î üç sehim hisse-i şer‘iyyesi olup mülk-i mezbûrun cânib-i kıblîsinden iki sofa ve bir bâb fevkānî beyt ve bir bâb tahtânî beyt önünde arsa-i hâliyesi ile ve bi’r-i mâî dahi üç sehim hisse-i şer‘iyyesini merkūm Abdünnebi’ye teslîm eyledim dedikde mukırr-ı mezbûrenin minvâl-i meşrûh üzere sâdır olan kelimâtın merkūm Abdünnebi bi’l-muvâcehe tasdîk ve tahkīk ettikden sonra işbu hurûf gıbbe’t-taleb ketb olunup yed-i tâlibe vaz‘ ve ref‘ olundu, inde’l-ihtiyâc ihticâc edeler. Tahrîren fi’l-yevmi’s-sânî ve’l-ışrîn min şehri Rebî‘ilâhir li sene ihdâ ve hamsîn ve elf. Şuhûdü’l-hâl: [6b] Mehmed Efendi b. Ali el-İmâm, Ali Efendi b. Hamza el-İmâm, el-Hâc Ali b. Kasım, Mehmed b. Mustafa, Mustafa b. Abdülkādir, Ali Beşe b. Abdullah, Ali b. Receb ve gayruhüm mine’l-hâzırîn.