Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 60 Hüküm no: 25 Orijinal metin no: [9b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Abdullah’ın ölen kocası Mehmed Çelebi b. Muhyiddin’in Mehmed Çelebi b. Hüseyin’deki alacağını tahsil etmesi Mahmiye-i Galata mahallâtından Yolcuzâde mahallesi sâkinlerinden olup bundan akdem fevt olan Mehmed Çelebi b. Muhyiddin nâm müteveffânın evlâd-ı sıgārı Mehmed ve Mustafa ve Emine ve Sâime’nin tesviye-i umûruna kıbel-i şer‘den mansûb vasiyy-i şer‘iyyesi olan Fâtıma bt. Abdullah nâm hâtun mahfil-i kazâda sıgār-ı mezbûrûna hasbî nâzır olan râfi‘ü hâze’l-kitâb Mehmed Çelebi b. Hüseyin nâm kimesne mahzarında bi’t-tav‘i’s-sâf ikrâr ve i‘tirâf edip zevcim müteveffâ-yı merkūm Mehmed Çelebi b. Muhyiddin’in mezbûr Mehmed Çelebi zimmetinde alâ tarîki’l-emâne yirmi dokuz bin altı yüz akçesi olup meblağ-ı mezbûru vesâyetim hasebiyle merkūm Mehmed Çelebi yedinden bi tamâmihî ahz ü kabz eyledim zimmetinde meblağ-ı mersûmdan bir akçe ve bir habbe bâkī kalmadı dedikde mukırra-i mezbûrenin vech-i muharrer üzere cârî olan kelâmını el-mukarru lehü’l-merkūm Mehmed Çelebi bi’l-muvâcehe tasdîk ve bi’l-müşâfehe tahkīk edicek, hâzihi’l-vesîkatü’l-enîka alâ mâ hüve’l-hakīka gıbbe’t-taleb ketb olundu. Fi’l-yevmi’s-sâlis aşer min Cumâdelûlâ li sene ihdâ ve hamsîn ve elf. Şuhûdü’l-hâl: Fahrü’l-eimme Ahmed Efendi b. Ramazan, İsa Efendi b. Musa el-İmâm, Ahmed Beşe b. Hamza el-Münâdî, Mehmed b. Emrullah, Hasan Beşe b. Abdullah, Mehmed b. İlyas, Ali b. Mehmed, Ali b. Abdullah ve gayruhüm.