Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 64 Hüküm no: 29 Orijinal metin no: [10b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müyessere Hâtun’un mehir alacağı olduğu İşbu sahîh ve şer‘î bir hüccettir ki mazmûnunda, hâric-i mahmiye-i Galata tevâbi‘inden Tophâne mahallâtından Muhyiddin mahallesi sükkânından udûlden Yahya b. Receb ve Halil b. İbrahim nâm kimesneler meclis-i şer‘-i şerîf ve mahfil-i dîn-i münîf el-masûn ani’t-tağyîr ve’t-tahrîfe hâzırân olup, bundan akdem fevt olan Şükrullah b. el-Hâc Yakub’un oğlu ve vâris-i kebîri olan Mehmed Çelebi mahzarında, müteveffâ-yı mezbûrun zevce-i metrûkesi Müyessere Hâtun bt. Zeyneddin’den sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müdde‘iye-i mezkûrenin müteveffâ zevci zimmetinde nikâhında ma‘kūdun aleyh olan mehri cihetinden lâzimü’l-edâ ve vâcibü’l-kazâ râyicü’l-vakt dört bin akçe hakkı vardır. Müdde‘iye-i mezbûreye meblağ-ı merkūmu sağlığında müteveffâ-yı mezkûrun kendisinden veya vekîlinden kısmen veya tamâmen almadığına, hibe etmediğine, bi vechin mine’l-vücûh zimmetini ibrâ etmediğine dâir yemîn billâh verildiğinde ve şâhidlerin şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olduğunda hâkim-i muvakki‘ a‘lâhu şehâdetleri mûcebince meblağ-ı mezbûrun müteveffâ-yı mezkûrun muhallefâtından müdde‘iye-i merkūmeye edâsına hükm etti. Cerâ zâlike ve hurrire fi’l-yevmi’s-sâbi‘ aşer min Cumâdelûlâ sene ihdâ ve hamsîn ve elf. Şuhûdü’l-hâl: Mehmed Çelebi b. Seydi Ali, el-Hâc Hasan b. Aydın, Ebûbekir b. Mustafa, el-Hâc Musa b. İbrahim, İbrahim b. Receb.