Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 65 Hüküm no: 30 Orijinal metin no: [10b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bâli b. Seydi’nin kardeşi Derviş Çorbacı b. Seydi’nin tek varisi olduğu Vilâyet-i Anadolu’da Beyşehir sancağında vâki‘ Göçü kazâsına tâbi‘ Çiçekler nâm karye sâkinlerinden bâ‘isü’l-kitâb Bâli b. Seydi nâm kimesne meclis-i şer‘de mahmiye-i Galata’da beytülmâl-i âmme ve hâssa emîni olan fahrü’l-akrân Mehmed Çelebi b. İsa mahzarında takrîr-i da‘vâ edip bundan akdem topçular çorbacısı olup Tekfurdağı’nda Demirli nâm karyede sâkin iken vefât eden Derviş Çorbacı b. Seydi nâm müteveffânın yine zümre-i topçulardan işbu hâzır bi’l-meclis diğer Mehmed Beşe b. Şaban yedinde alâ tarîki’l-vedî‘a üç sahan ve bir tencere-i sagīr ve bir küçük kahve ibriği ve dört fincan ve bir köhne kebe ve bir köhne yastık ve beş köhne garâr ve on beş dirhem nısfiyye sîmden ma‘mûl kuşak ve bir küçük kantar ve bir köhne tülbent bürgü ve yetmiş üç riyâlî guruşu olup müteveffâ-yı mezbûr Derviş Çorbacı benim li ebeveyn karındaşım olup verâseti bana münhasıra iken emîn-i merkūm Çelebi b. İsa eşyâ-i merkūmeye vaz‘-ı yed eylemek murâd eder, suâl olunup mûcebiyle amel olunması matlûbumdur dedikde gıbbe’s-suâl emîn-i merkūm Mehmed Çelebi cevâbında fi’l-hakīka merhûm-ı mezbûr Derviş Çorbacı vefât edip zâhirde vâris-i ma‘rûfu olmamağla muhallefât-ı mezbûre beytülmâle âide olup mezbûr Bâli müteveffâ-yı merkūmun li ebeveyn karındaşı olduğu ma‘lûmum değildir dedikde merkūm Bâli’nin sıdk-ı makāline mutâbıka beyyine taleb olundukda udûl-i ricâlden olup yine karye-i mezbûre Çiçekler’den Abdülkerim b. Âşur ve Bâli b. Süleyman ve diğer Bâli b. el-Hâc Hazım nâm kimesneler li ecli’ş-şehâde hâzırûn bi’l-meclis olup gıbbe’l-istişhâd edâ-i şehâdet-i şer‘iyye edip fi’l-hakīka merkūm Bâli b. Seydi [11a] müteveffâ-yı mezbûr Derviş Çorbacı b. Seydi’nin li ebeveyn karındaşı olup babaları merkūm Seydi ve anaları Satı nâm hâtundur, verâseti mezbûr Bâli’ye münhasıra olup müteveffâ-yı mezbûrun merkūm Bâli’den gayrı vârisi olduğu ma‘lûmumuz değildir, biz bu husûsa minvâl-i muharrer üzere şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde şehâdetleri ba‘de’t-ta‘dîl ve’t-tezkiyye hayyiz-i kabûlde vâkı‘a oldukdan sonra emîn-i mezbûr Mehmed Çelebi mu‘ârazadan men‘ birle gıbbe’t-taleb ketb olundu. Hurrire fi’l-yevmi’t-tâsi‘ min Cumâdelâhire li sene 1051. Şuhûdü’l-hâl: Ali Çelebi b. Mustafa, Mustafa Çelebi b. Mehmed, Hüseyin Bey Çorbacı-i topçuyân, Mustafa Çelebi b. Ali, Mehmed b. Dede ve gayruhüm.