Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 66 Hüküm no: 32 Orijinal metin no: [11a-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Ali’nin Rus asıllı câriyesini azat ettiği El-emru kemâ zükire fîhi. Ben abd-i fakīr ileyhi sübhânehû medîne-i mahmiye-i Galata ve tevâbi‘i askerî kassâmı Arabzâde demekle meşhûr olan İbrahim’in -ufiye anhümâ- Udûlden Seyyid Hüseyin b. Seyyid İbrahim ve Mehmed b. Musa nâm kimesneler meclis-i şer‘-i şerîf ve mahfil-i dîn-i münîf el-masûn ani’t-tağyîr ve’t-tahrîfe hâzırân olup, hâl-i hayâtında hâric-i mahmiye-i Galata tevâbi‘inden Tophâne kasabası mahallâtından Ebülfazl mahallesinde sâkin iken bundan akdem tarîk-i hacda vefât eden el-Hâc Ali’nin Râbia nâm sagīresine kıbel-i şer‘den mansûb vasî olan ve vesâyeti hasebince âti’z-zikr hâtuna müteveffâ-yı mezbûrun câriye-i memlûkesi zannıyla vâzı‘ü’l-yed bulunan fahrü’l-müderrisîn Ali Efendi b. Şaban mahzarında, uzun boylu, sarışın, elâ gözlü, açık kaşlı, Rûsiyyetü’l-asl bâ‘isetü hâze’l-kitâb Dilâver bt. Abdullah’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müteveffâ-yı mezbûr el-Hâc Ali, hâl-i hayâtı ve kemâl-i aklında kendisine rıkkını mu‘terife olan müdde‘iye-i mezbûreyi âzâd ve tahrîr etmişdi, elân sâir harâir-i asliyyât-ı mükellefât gibi hürredir. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın mûcebince hükm edildi. Cerâ zâlike ve hurrire fi’l-yevmi’l-âşir min şehri Rebî‘ilevvel sene ihdâ ve hamsîn ve elf. Şuhûdü’l-hâl: Ali b. İbrahim, Mehmed b. Mustafa, Mustafa b. Mehmed, Süleyman b. Abdullah, Ali b. Mustafa, Mehmed Beşe b. Mustafa, Ahmed Efendi el-Kâtib, Mahmud b. İlyas.