Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 66 Hüküm no: 31 Orijinal metin no: [11a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bâli b. Seydi’nin kardeşi Derviş Çorbacı b. Seydi’den intikal eden terekeyi almak üzere Osman Ağa b. Cafer Ağa’ya vekalet vermesi Topçular çorbacısı olup bundan akdem Tekfurdağı’nda vâki‘ Demirli nâm karyede sâkin iken vefât eden Derviş Çorbacı b. Seydi nâm müteveffânın verâseti li ebeveyn karındaşı Bâli b. Seydi nâm kimesneye münhasıra oldukdan sonra mezbûr Bâli meclis-i şer‘de ser-topçuyân olan iftihârü’l-emâcid ve’l-ekârim hâfızü’l-kitâb Osman Ağa b. Cafer Ağa mahzarında ikrâr ve i‘tirâf edip mûrisim olan müteveffâ-yı mezbûr Derviş Çorbacı zimmetinde müşârün-ileyh Osman Ağa’nın on bin akçe hakkı olup merhûm-ı mezbûrun zimem-i nâsda olan yüz guruşunu ve karye-i mezbûrede beytülmâl emîni yedinde mazbût olan iki bârgir ve sâir cüz’î ve küllî emîn-i mezbûr kabz eylediği eşyâyı da‘vâ ve talebe ve ahz u kabza ve meblağ-ı mezbûrdan on bin akçeyi kendi deyni için alıp mâ‘adâsını bana îsâle vekîl nasb u ta‘yîn eyledim dedikde ol dahi vekâlet-i mezbûreyi minvâl-i meşrûh üzere kabûl ve hizmet-i lâzımesini edâya ta‘ahhüd eylemeğin hâzihi’l-vesîka gıbbe’t-taleb ketb olundu. Fi’t-târihi’l-mezbûr. Şuhûdü’l-hâl: El-Mezbûrûn.