Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 67 Hüküm no: 34 Orijinal metin no: [11b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Abdullah’ın çocukları Mustafa Çelebi ve Halil’in babalarından intikal eden köledeki hisselerini anneleri Ümmühâni bt. Ahmed’e satmaları Mahmiye-i Galata müzâfâtından olup kasaba-i Tophâne mahallâtından Ebülfazl mahallesinde sâkin iken bundan akdem vefât eden Mehmed Beşe b. Abdullah nâm müteveffânın verâseti sulbî kebîr oğlu Mustafa Çelebi’ye ve yine sulbî sagīr oğlu Halil’e ve zevce-i metrûkesi olup mezbûrânın vâlideleri Ümmühâni bt. Ahmed nâm hâtuna münhasıra oldukdan sonra merkūm Mustafa Çelebi sagīr-i mezbûr Halil’in tesviye-i umûruna kıbel-i şer‘den mansûb [vasî] olmağla kendi tarafından asâleten ve sagīr-i mersûm Halil tarafından vesâyeten meclis-i şer‘de bâ‘isetü’l-kitâb vâlidesi merkūme Ümmühâni mahzarında bi’l-asâle ve bi’l-vesâye ikrâr ve i‘tirâf edip babam merhûm-ı mezbûr Mehmed Beşe’den intikāl edip işbu hâzır bi’l-meclis uzun boylu açık kaşlı sarı elâ gözlü Rûsiyyü’l-asl Yusuf b. Abdullah nâm gulâmın sekiz sehimden bir sehimi vâlidem mezbûre Ümmühâni’ye intikāl edip ve yedi sehimi dahi merkūm Halil ile bana intikāl eylemekle gulâm-ı mezbûrun yedi [12a] sehimini asâleten ve vesâyeten hîn-i müzâyede de vâlidem mezbûre Ümmühâni’ye yüz yetmiş riyâl guruşa bey‘ edip kabz-ı semen ve teslîm-i müsemmen eyledim ba‘de’l-yevm mezbûr Yusuf’un yedi sehimi dahi mülk-i müşterâsı olup keyfe mâ teşâ’ ve tahtâr mutasarrıfa olsun, mukırr-ı mezbûrun vech-i muharrer üzere cârî olan kelâmını el-mukarru leha’l-merkūme Ümmühâni tasdîk edicek, hâzihi’l-vesîka gıbbe’t-taleb ketb olundu. Hurrire fi’l-yevmi’s-sânî ve’l-ışrîn min Cumâdelâhire li seneti’l-mezbûre. Şuhûdü’l-hâl: El-mersûmûn.