Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 69 Hüküm no: 38 Orijinal metin no: [12b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Beytülmâl emini Mehmed Çelebi b. İsa’nın Derviş Çorbacı b. Seydi’ye ait muhallefâtı teslim alması Mahmiye-i Galata’da beytülmâl-i âmme ve hâssa emîn[i] olan fahrü’l-akrân Mehmed Çelebi b. İsa meclis-i şer‘de kasaba-i Tophâne mahallâtından mahalle-i Tomtom sâkinlerinden olup zümre-i topçuyândan bâ‘isü’l-kitâb Mehmed Beşe b. Şaban mahzarında bi’t-tav‘ ikrâr ve i‘tirâf edip topçular çorbacılarından olup Tekfurdağı’nda Demirli nâm karyede sâkin iken vefât eden Derviş Çorbacı b. Seydi nâm müteveffânın hâl-i hayâtında merkūm Mehmed Beşe’ye üç sahan ve bir tencere ve bir küçük kahve ibriği ve bir köhne Yanbolu kebesi ve bir köhne yastık ve beş köhne garâr ve on beş dirhem nısfiyye sîmden ma‘mûl kuşak ve bir küçük kantar ve bir köhne tülbent bürgü ve dört fincan ve yetmiş üç riyâl guruş alâ tarîki’l-vedî‘a vaz‘ edip merkūm Derviş Çorbacı vefât edip zâhirde vâris-i ma‘rûfu olmamağla muhallefât-ı mezbûre beytülmâle âide olmağın emânetim hasebiyle eşyâ-i mezkûreyi merkūm Mehmed Beşe yedinden bi’t-tamâm ahz ü kabz eyledim dedikde merkūm Mehmed Beşe dahi bi’l-muvâcehe tasdîk edicek, hâzihi’l-vesîka gıbbe’t-taleb ketb olundu. Hurrire fi’l-yevmi’t-tâsi‘ aşer min Cumâdelâhire li sene ihdâ ve hamsîn ve elf. Şuhûdü’l-hâl: Hüseyin Halîfe b. Şaban, Ali Çelebi b. Mustafa, Mustafa Çelebi b. Receb, Hüseyin Çorbacı, Receb b. Ali, Mehmed b. Dede, Ali b. Mustafa ve gayruhüm.