Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 74 Hüküm no: 44 Orijinal metin no: [14a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Efendi b. Hüseyin’in muhallefâtının varisleri arasında paylaşılması Mahmiye-i Galata tevâbi‘inden kasaba-i Beşiktaş mahallâtından Sinan Paşa mahallesi sâkinlerinden olup bundan akdem vefât eden merhûm Mehmed Efendi b. Hüseyin’in verâseti sulbiye kebîre kızı Emine Hâtun ve sulbiye sagīre kızı Hatice’ye ve li ebeveyn karındaşı oğlu Ali Çelebi b. Mustafa’ya münhasıra olduğu şer‘an mütehakkik oldukdan sonra müteveffâ-yı mezbûrun muhallefâtı onlara kısmet olundukda bir sehimi mezbûre Emine Hâtun’a ve bir sehimi sagīre-i mezbûre Hatice’ye ve bir sehimi mezbûr Ali Çelebi’ye isâbet ettiği müte‘ayyin oldukdan sonra mezbûr Ali Çelebi ve Emine Hâtun ve sagīre-i mezbûrenin kıbel-i şer‘den mansûbe vasiyye-i şer‘iyyesi Safiye Hâtun bt. Abdullah meclis-i şer‘-i hatîr-i lâzimü’t-tevkīrde her biri takrîr-i kelâm ve ta‘bîr ani’l-merâm edip mûrisimiz müteveffâ-yı mezbûrun muhallefâtından olup mahalle-i mezbûrede vâki‘ hudûdunun bir tarafı Dürri Efendi mülkü ve bir tarafı sarrâc Mustafa mülkü ve bir tarafı Şaban Çelebi mülkü ve ba‘zan beyne’l-verese müşterek olan bahçe ile müntehî beş bâb fevkānî beyt ve üç bâb tahtânî beyt ve bir matbah ve üç sofa ve bir kiler ve bi’r-i mâ ve üç kenîf ve bir fırın ve önlerinde arsa-i hâliye[yi] müştemil olan mülk menzil ve yine mahalle-i mezbûrede vâki‘ tahdîdden müstağnî mülk bahçe bi hasebi’l-irsi’ş-şer‘î bize intikāl edip beynimizde kısmet-i âdile ile kısmet olunmak matlûbumuzdur dediklerinde savb-ı şer‘-i kavîmden bu hakīr ve hâssa mi‘mârlardan el-Hâc Hasan [b.] Ömer ile zeyl-i kitâbda mastûrü’l-esâmî müslimîn ile menzil-i mezbûrun üzerine varıp akd-i meclis olundukda menzil-i mezbûr müteveffâ-yı mezbûrun olduğu mülkü olup ve ba‘de vefâtihî verese-i mezbûrûna irsle intikāl ettiği sâbit ve zâhir oldukdan sonra mi‘mâr-ı mezkûr misâha ettikde menzil-i mezbûrun arsa-i beytiyyesi be hesâb-ı şatrancî tûlen ve arzen bennâ zirâ‘ı ile yedi yüz seksen zirâ‘ ve arsa-i hâliyesi bin beş yüz otuz üç zirâ‘ cem‘an iki bin iki yüz kırk zirâ‘ olup menzil-i mezbûrun hudûdunun bir tarafı Mustafa mülkü ve bir tarafı Dürri Efendi mülkü ve bir tarafı sagīre-i mezbûre Hatice mülkü ve ba‘zan beyne’l-verese müşterek olan bahçe ile vâris-i mezbûr Ali Çelebi mülkü ile müntehî bir bâb fevkānî beyt ve bir matbah ve iki kenîf ve bir fırın ve arsa-i hâliye[yi] müştemil olup arsa-i beytiyyesi be hesâb-ı mezkûr yüz altmış zirâ‘ ve arsa-i hâliyesi sekiz yüz yetmiş üç zirâ‘ menzil mezbûre Emine Hâtun’a hisse-i şer‘iyye ta‘yîn ve tahsîs olunup ve menzil-i mezbûrun hudûdunun bir tarafı Şaban Çelebi mülkü ve tarafeyn merkūme Emine Hâtun mülkü ve taraf-ı âharı beyne’l-verese müşterek olan bahçe-i mezkûr ile müntehî iki bâb fevkānî beyt ve bir kiler ve bi’r-i mâ ve kenîf ve arsa-i hâliye[yi] müştemil olan menzil be hesâb-ı mezkûr arsa-i beytiyyesi üç yüz yetmiş sekiz zirâ‘ ve arsa-i hâliyesi üç yüz on zirâ‘ menzil sagīre-i mezbûre Hatice’ye hisse-i şer‘iyye ta‘yîn ve tahsîs olunup ve menzil-i mezbûrun hudûdunun bir tarafı Hasan Bey mülkü ve bir tarafı sagīre-i mezbûre Hatice mülkü ve bir tarafı Şaban Çelebi mülkü ve taraf-ı âharı bahçe-i mezkûre ile müntehî iki bâb fevkānî beyt ve bir bâb tahtânî beyt ve iki sofa ve bir kenîf ve arsa-i hâliye[yi] müştemil menzil arsa-i beytiyyesi be hesâb-ı mezkûr yüz yetmiş zirâ‘ ve arsa-i hâliyesi iki yüz zirâ‘ ve menzil-i mezbûra muttasıl olan bahçeden dahi yüz yetmiş zirâ‘ arsa-i hâliye zam olunup mezbûr Ali Çelebi’ye hisse-i şer‘iyye ta‘yîn ve tahsîs olunup lâkin menzil-i mezbûrun tarîki beyne’l-verese müşterek olmak üzredir ve bahçe-i mezbûr dahi be hesâb-ı mezkûr arsası otuz beş bin üç yüz zirâ‘ ve arsa-i beytiyyesi iki yüz zirâ‘ cem‘an [14b] otuz beş bin beş yüz zirâ‘ olup altmış altı buçuk zirâ‘ arsa-i beytiyye ile on bir bin yedi yüz altmış altı zirâ‘ arsa-i gayr-ı beytiyye mezbûre Emine Hâtun’a hisse ta‘yîn ve tahsîs olunup ve yine minvâl-i mezkûr üzere altmış altı buçuk zirâ‘ arsa-i beytiyye ile on bir bin yedi yüz altmış altı zirâ‘ arsa-i gayr-ı beytiyye sagīre-i mezbûre Hatice’ye hisse ta‘yîn ve tahsîs olunup ve altmış altı buçuk zirâ‘ arsa-i beytiyye ile on bir bin yedi yüz altmış altı zirâ‘ arsa-i gayr-ı beytiyye mezbûr Ali Çelebi’ye hisse ta‘yîn ve tahsîs olunup mezbûrân Ali Çelebi ve Emine Hâtun asâleten ve mezbûre Safiye Hâtun vesâyeten her biri bi’t-terâzî kabûl ve kabz edip alâmât-ı fâsıla vaz‘ olundukdan sonra mezbûrûn her birimiz âharın hisse-i şer‘iyyesinde alâka ve medhalimiz kalmadı dediklerinde gıbbe’t-taleb işbu hurûf ketb olundu. Tahrîren fi’l-yevmi’s-sânî min Şa‘bâni’l-mu‘azzam li sene ihdâ ve hamsîn ve elf min hicreti men lehü’l-izzü ve’ş-şeref. Şuhûdü’l-hâl: Mehmed Beşe b. el-Hâc Memi, el-Hâc Murad b. Abdullah, Mustafa Çelebi b. Süleyman, Mehmed Bey b. Abdullah, Abdülkādir b. Süleyman, Mehmed Kapudân b. Abdullah, Hüseyin Çelebi b. Yusuf, Mahmud Bey b. İlyas ve gayruhüm.