Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 76 Hüküm no: 45 Orijinal metin no: [14b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râbia Hâtun bt. Hüseyin’in muhallefâtının başka varisi olmadığından amcasının çocukları Mehmed ve Ali’ye teslimi İşbu bâ‘isü’l-kitâb Mehmed ve Ali ibnâ Ahmed meclis-i şer‘de mahmiye-i Galata tevâbi‘inden kasaba-i Kasımpaşa mahallâtından Kulaksız mahallesinde maktûle olan Râbia Hâtun bt. Hüseyin’in vâris-i ma‘rûfu olmamak zu‘muyla muhallefâtına vâzı‘ü’l-yed olup kasaba-i mezbûrede bi’l-fi‘l emîn-i beytülmâl olan Ahmed Çelebi b. Mustafa muvâcehesinde takrîr-i da‘vâ edip mezbûre Râbia Hâtun’un li ebeveyn ammisi oğulları ve usûbet-i nesebiyye cihetinden vârisleridir, zîrâ mezbûre hâtunun babası mezbûr Hüseyin bizim babamız mezbûr Ahmed ile li ebeveyn karındaşlardır, mezbûrân Hüseyin ve Ahmed’in babaları Mehmed nâm kimesnedir, mezbûre Râbia’nın verâseti bize münhasıradır, muhallefât-ı mezbûrdan emîn-i mezbûrun yedi kasr olunup bize teslîm olunmak matlûbumuzdur suâl olunsun dediklerinde gıbbe’s-suâl emîn-i mezbûr mezbûrân Mehmed ve Ali mezbûre Râbia’nın vech-i muharrer üzere vârisleri olduğunu inkâr edicek, mezbûrân Mehmed ve Ali’den sıdk-ı makāllerine beyyine taleb olundukda udûl-i müslimînden Seyyid Yusuf b. Mehmed ve Yusuf b. Abdullah nâm kimesneler li ecli edâi’ş-şehâde meclis-i şer‘a hâzırân olup istişhâd olunduklarında fi’l-vâki‘ mezbûrân Mehmed ve Ali makt3ule-i mezbûrenin li ebeveyn ammisi oğulları ve usûbet-i nesebiyye cihetinden vârisleridir mezbûre Râbia’nın babası mezbûr Hüseyin müdde‘iyân-ı mezbûrân Mehmed ve Ali’nin babaları mezbûr Ahmed ile li ebeveyn karındaşlardır, mezbûrân Hüseyin ve Ahmed’in babaları Mehmed nâm kimesnedir, mezbûre Râbia’nın bunlardan gayrı vârisi olduğu ma‘lûmumuz değildir, verâseti mezbûrân Mehmed ve Ali’ye münhasıradır bu vech üzere şâhidleriz, şehâdet dahi ederiz dediklerinde gıbbe’t-ta‘dîl ve’t-tezkiyye şehâdetleri hayyiz-i kabûlde vâkı‘a olup emîn-i mezbûr muhallefât-ı mezkûreden kasr-ı yed edip vârisân-ı mezbûr Mehmed ve Ali’ye teslîme tenbîh birle mâ vaka‘a bi’t-taleb ketb olundu. Şuhûdü’l-hâl: Fahrü’l-akrân Mustafa b. Ahmed, Mehmed b. Ali el-İmâm, Mustafa b. Ali, Mehmed b. Ömer, Mehmed b. Memi.