Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 87 Hüküm no: 54 Orijinal metin no: [17b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Mustafa Beşe’nin Abdülfettâh b. Abdülvedûd’a borcu olduğu Udûlden Hızır Efendi b. Kemal ve Mehmed b. Hüseyin nâm kimesneler meclis-i şer‘-i şerîf ve mahfil-i dîn-i münîf el-masûn ani’t-tağyîr ve’t-tahrîfe hâzırân olup, mahmiye-i Galata tevâbi‘inden Tophâne kasabası mahallâtından Mustafa Ağa mahallesinde sâkin iken bundan akdem fevt olan zevci Mustafa Beşe ile müşterek sagīre kızları Şâkire ve Fâtıma’ya kıbel-i şer‘den mansûbe vasî olan İsmihan bt. Ömer nâm hâtun mahzarında, mahmiye-i Kostantıniyye mahallâtından Müftü Ali Çelebi mahallesi sükkânından el-Hâc Abdülfettâh b. Abdülvedûd’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müdde‘î-i mezbûrun müteveffâ-yı merkūmun zimmetinde karz-ı şer‘î cihetinden lâzimü’l-edâ ve vâcibü’l-kazâ râyicü’l-vakt beş yüz riyâlî guruş hakkı vardır. Müdde‘î-i mezbûra meblağ-ı merkūmu sağlığında müteveffâ-yı mezkûrun kendisinden veya vekîlinden kısmen veya tamâmen almadığına, hibe etmediğine, bi vechin mine’l-vücûh zimmetini ibrâ etmediğine dâir yemîn billâh verildiğinde ve şâhidlerin şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olduğunda hâkim şehâdetleri mûcebince meblağ-ı mezbûrun müteveffâ-yı mezkûrun muhallefâtından müdde‘î-i merkūma edâsına hükm etti. Cerâ zâlike ve hurrire fi’l-yevmi’l-ışrîn min şehri Ramazâni’l-mübârek sene ihdâ ve hamsîn ve elf. [18a] [Şuhûdü’l-hâl]: Mahmud Bey b. Abdullah, el-Hâc Şükrullah b. Mehmed, Ahmed Bey b. Ali, Mehmed Çelebi b. Mustafa, Ahmed Çelebi b. Hasan, el-Hâc Receb b. Abdullah, Mahmud b. İlyas ve gayruhüm mine’l-hâzırîn.