Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 93 Hüküm no: 60 Orijinal metin no: [19b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Mustafa Beşe’nin Safiye Hâtun’a ödünçten borcu olduğu Udûlden Hızır Efendi b. Kemal ve el-Hâc Receb b. Mustafa nâm kimesneler meclis-i şer‘-i şerîf ve mahfil-i dîn-i münîf el-masûn ani’t-tağyîr ve’t-tahrîfe hâzırân olup, mahmiye-i Galata tevâbi‘inden Tophâne kasabası mahallâtından Mustafa Ağa mahallesinde sâkin iken bundan akdem fevt olan Mustafa Beşe’nin sagīre kızları Şâkire ve Fâtıma’ya kıbel-i şer‘den mansûbe vasî olan İsmihan bt. Ömer nâm hâtun mahzarında, mahalle-i mezbûrede sâkine olan Safiye Hâtun bt. Ali nâm hâtundan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müdde‘iye-i mezbûrenin müteveffâ-yı merkūmda karz-ı şer‘î cihetinden vâcibü’l-kazâ iki yüz riyâlî guruş hakkı vardır. Müdde‘iye-i mezbûreye meblağ-ı merkūmu sağlığında müteveffâ-yı mezkûrun kendisinden veya vekîlinden kısmen veya tamâmen almadığına, hibe etmediğine, bi vechin mine’l-vücûh zimmetini ibrâ etmediğine dâir yemîn billâh verildiğinde ve şâhidlerin şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olduğunda hâkim şehâdetleri mûcebince meblağ-ı mezbûrun müteveffâ-yı mezkûrun muhallefâtından müdde‘iye-i merkūmeye edâsına hükm etti. Cerâ zâlike ve hurrire fi’l-yevmi’l-hâdî aşer min Şevvâli’l-mükerrem sene ihdâ ve hamsîn ve elf. Şuhûdü’l-hâl: Mehmed Reis b. Hüseyin, el-Hâc Abdülfettâh b. Abdülvedûd, Mehmed b. Mustafa, Mahmud b. İlyas ve gayruhüm