Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 110 Hüküm no: 77 Orijinal metin no: [23a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Mehmed’in Âbide Hâtun bt. Âbidin’de miras alacağı olduğu iddiasından men edildiği Mahmiye-i Galata müzâfâtından olup kasaba-i Tophâne’de Cihangir mahallesi sâkinlerinden [olup] bundan akdem vefât eden Abdülkādir b. İhsan nâm müteveffânın verâseti li üm kız karındaşı Âişe bt. Mehmed nâm hâtuna ve zevce-i metrûkesi Âbide Hâtun bt. Âbidin’e münhasıra olduğu şer‘an müte‘ayyin olduğu mütehakkik oldukdan sonra mezbûre Âişe mahfil-i kazâda merkūme Âbide mahzarında takrîr-i da‘vâ edip müteveffâ-yı mezbûrun muhallefâtından hâric ez-defter yüz elli akçe kıymetli bir müsta‘mel sarı atlas kaftan ve yüz otuz akçe kıymetli bir müsta‘mel beyaz velense ve bir sîm bıçak ve yine hâric ez-defter ba‘zı eşyâ ihfâ ve ketm eylemişdir, suâl olunup hakkım alıverilmek matlûbumdur dedikde gıbbe’s-suâl mezbûre Âbide cevâbında zikr olunan eşyâ benim mülküm olup müteveffâ-yı mezbûrun muhallefâtından değildir ve hâric ez-defter şey’ ihfâ ve ketm eylemedim dedikde mezbûre Âişe ikāmet-i beyyineden âcize olup istihlâf olundukda mezbûre Âbide dahi alâ vefki’l-mes’ûl yemîn billâhi’l-aliyyi’l-a‘lâ eyledikden sonra mu‘ârazadan men‘ birle gıbbe’t-taleb ketb olundu. Hurrire fî 26 şehri Zilka‘de li sene 1051. Şuhûdü’l-hâl: Hüseyin Çelebi b. Ali, Mahmud b. İlyas, Ali Halîfe b. Mustafa ve gayruhüm.