Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 110 Hüküm no: 78 Orijinal metin no: [23b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi’nin çocukları Râbia ve Mehmed Ağa’nın miras ev hisselerini kardeşleri Zamâne Hâtun’a sattıkları Mahmiye-i Galata tevâbi‘inden kasaba-i Kasımpaşa’da Çatmamescid mahallesi sâkinlerinden olup bundan akdem vefât eden merhûm Mustafa Çelebi’nin sulbiye sagīre kızı Râbia’nın vâlidesi ve tesviye-i umûruna kıbel-i şer‘den mansûbe vasîsi Sitti Hâtun bt. Çerağ meclis-i şer‘de sagīre-i mezbûrenin li eb kız karındaşı Zamâne Hâtun mahzarında ikrâr-ı tâm ve takrîr-i kelâm edip mahalle-i mezbûrede vâki‘ merhûm Cündî Mehmed Ağa evkāfından olup tarafeyni Şaban Kapudân mülkü ile Şaban Çelebi mülküne ve tarafeyn-i âhareyni vakf-ı mezbûr ile tarîk-i hâssa müntehî beş bâb fevkānî ve üç bâb tahtânî odaları ve bi’r-i mâ ve kenîfi muhtevî olan menzil icâre-i mu‘accele ve müeccele ile müteveffâ-yı mezbûrun tasarrufunda olup ba‘de vefâtihî intikāl-i âdî ile kızı sagīre-i mezbûre ile merkūme Zamâne’ye ve sulbî kebîr oğlu Mehmed Ağa’ya intikāl edip menzil-i mezbûr harâba müşrif olmağla gallesi ta‘mîre kifâyet etmeyip ve sagīre-i mezbûrenin menkūlât kısmından ism-i mâl ıtlâk olunur şey’i olmayıp nafakaya zarûreti olduğunu zeyl-i kitâbda isimleri mastûr olan müslimîn ihbâr ettikden sonra menzil-i mezbûrdan sagīre-i mezbûre merkūmenin üç sehimden bir sehim hissesi sûk-ı sultânîde müzâyede olunup rağabât-ı nâs münkatı‘a oldukdan sonra merkūme Zamâne Hâtun üzerinde râyic fi’l-vakt yirmi altı bin beş yüz akçede karâr edip ziyâde ile tâlib-i âhar olmamağla sagīre-i mezbûre Râbia’nın menzil-i mezkûrdan olan üç sehimden bir sehim hissesinin hakk-ı tasarrufunu ma‘rifet-i mütevellî ile meblağ-ı mezbûr yirmi altı bin beş yüz akçe mukābelesinde vesâyetim hasebiyle ferâğ ve tefvîz edip ol dahi tefevvuz [ve] kabûl eyledikden sonra bedel-i ferâğ olan meblağ-ı mezkûru yedinden ahz ü kabz eyledim dedikde gıbbe’t-tasdîki’l-mu‘teber müteveffâ-yı mezbûrun oğlu merkūm Mehmed Ağa dahi merkūme Zamâne Hâtun mahzarında ikrâr ve takrîr-i kelâm edip ben dahi zikri mürûr eden menzilde üç sehimden bir sehim hissenin hakk-ı tasarrufunu izn-i mütevellî ile merkūme Zamâne Hâtun’a yirmi altı bin beş yüz akçe bedel mukābelesinde ferâğ ve tefvîz edip ol dahi tefevvuz ve kabûl eyledikden sonra bedel-i ferâğ olan meblağ-ı mezkûru yedinden tamâmen alıp kabz eyledim ba‘de’l-yevm menzil-i mezkûrun cümlesi mesfûre Zamâne Hâtun’un dâhil-i havza-i tasarrufunda olmuşdur, keyfe mâ teşâ’ mutasarrıf olsun dedikde gıbbe’t-tasdîki’t-taleb ketb olundu. Tahrîren fi’l-yevmi’l-hâdî aşer min Zilka‘deti’ş-şerîfe li sene ihdâ ve hamsîn ve elf. Şuhûdü’l-hâl: Mahmud Kapudân b. Ahmed, Hasan Halîfe el-İmâm, Mustafa b. Hızır, Hasan Çavuş b. İbrahim, Hasan Çelebi b. Mehmed, Ebûbekir b. Ali, Halil b. Abdullah ve gayruhüm.