Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 677 Hüküm no: 871 Orijinal metin no: [104a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Cafer’in, Abdi Beşe b. Mehmed’e emanet olarak verdiği câriyelerinin geri verilmesi Mahmiye-i İstanbul’da Asmalı Mescid kurbunda sâkine bâ‘isetü’l-kitâb Sâliha bt. Cafer nâm hâtun meclis-i şer‘-i şerîfde Abdi Beşe b. Mehmed nâm kimesne mahzarında üzerine da‘vâ ve takrîr-i kelâm edip yüz beş esedî guruş kıymetli orta boylu, kara gözlü, kara kaşlı, Rûsiyyetü’l-asl Timurhan bt. Abdullah ve üç yüz esedî guruş kıymetli uzun boylu, kara gözlü, kara kaşlı ( ) asl Gülbûy bt. Abdullah nâm câriyelerimi bi tarîki’l-emâne mezbûr Abdi Beşe’ye def‘ ve teslîm edip mezbûr Abdi Beşe dahi vech-i mübeyyen üzre yedimden ahz u kabz etmişdir suâl olunup ihkāk-ı hak olunmak matlûbumdur dedikde gıbbe’s-suâl mezbûr Abdi Beşe cevâbında müdde‘iyye-i mezbûre mevsûfeteyn-i mezbûreteyni iki yüz yetmiş esedî guruşa bana bey‘ ve teslîm edip ben dahi iştirâ ve tesellüm etmişidim deyû def‘le mukābele edicek gıbbe’s-suâl ve’l-inkâr mezbûr Abdi Beşe’den def‘-i mezbûru mübeyyine beyyine taleb olundukda ityân-ı beyyineden izhâr-ı acz ile istihlâf etmeğin mevsûfeteyn-i mezbûreteyni semen-i merkūma mezbûr Abdi Beşe’ye bey‘ ve teslîm etmediğine müdde‘iyye-i mezbûre Sâliha Hâtun’a yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince mevsûfeteyn-i mezbûreteyni mevcûdlar ise müdde‘iyye-i mezbûreye teslîme müstehlekeler ise kıymet-i şer‘iyyeleri ba‘de’s-sübût müdde‘iyye-i mezbûreye zâmin olmak üzre mezbûr Abdi Beşe’ye tenbîh olunmağın mâ vaka‘a bi’t-taleb ketb olundu. Fi’l-yevmi’s-sânî aşer min Ramazâni’l-mübârek li sene seb‘a ve seb‘în ve elf. Şuhûdü’l-hâl: Hüseyin b. Mustafa, İbrahim Beşe b. Hasan el-Mübâşir, Mehmed Çelebi b. Abdullah, İbrahim Çelebi b. Ahmed, Hasan Çelebi b. Ahmed.