Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 124 Hüküm no: 88 Orijinal metin no: [27b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kadri Çelebi b. İhsan’ın varislerinden kardeşi Ayşe bt. Mehmed’in diğer varis hanımı Âbide Hâtun bt. Âbidin’e karşı açtığı ev davasının reddedilği Mahrûse-i Galata hâricinde kasaba-i Tophâne’de Cihangir mahallesinde bundan akdem vefât eden Kadri Çelebi b. İhsan’ın li üm kız karındaşı Âişe bt. Mehmed nâm hâtun meclis-i şer‘de müteveffâ-yı mezbûrun zevce-i metrûkesi Âbide Hâtun bt. Âbidin mahzarında üzerine da‘vâ ve takrîr-i kelâm edip mahalle-i merkūmede vâki‘ etrâf-ı selâsesi Hoca Maksud mülküne ve taraf-ı râbi‘i Mehmed Reis mülküne müntehî iki beyt-i süflîyi ve cüneyneyi ve bi’r-i mâî muhtevî olan menzil ecdâdımdan Turgud nâm kimesnenin mülkü olup mezbûr Turgud hâl-i kemâl-i sıhhatinde vakf ve haps edip tevliyyet ve süknâsını evvelâ kendiye ba‘dehû zevcesi Emine bt. Nasuh’a ba‘de vefâtihâ kendi evlâdına ve evlâd-ı evlâdına ba‘de’l-inkırâz Cihangir câmi‘i’nin müezzin ve kayyımına ba‘dehû fukarâ-i sâlihîne şart ve ta‘yîn edip hâlâ ben mezbûr Turgud’un evlâdından olup me’ûnet-i süknâ bana intikāl etmiş iken mezbûre Âbide zevci müteveffâ-yı mesfûr Kadri Çelebi’nin terekesinden olmak üzere vaz‘-ı yed eder, suâl olunup kasr-ı yedine tenbîh olunmak matlûbumdur dedikde gıbbe’s-suâl mezbûre Âbide müdde‘iye-i mezbûre Âişe vâkıf-ı müşârün-ileyhin evlâdından olduğunu ikrâr ve menzil-i mezbûrun minvâl-i muharrer üzere vakıf olduğunu inkâr edicek, müdde‘iye-i merkūme Âişe’den da‘vâsına mutâbıka beyyine taleb olundukda udûl-i ricâlden olup mahalle-i merkūme sükkânından Derviş Bey b. Mehmed nâm râcil ve Murad b. Abdullah nâm kimesne li ecli’ş-şehâde meclis-i şer‘a hâzırân olup gıbbe’l-istişhâd fi’l-vâki‘ menzil-i mesfûrun minvâl-i muharrer üzere vakıf olduğu bizim ma‘lûmumuzdur, biz bu husûsa bu vech üzere şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle oldukdan sonra merkūme Âbide Hâtun mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’r-râbi‘ min Zilhicceti’ş-şerîfe li sene ihdâ ve hamsîn ve elf. Şuhûdü’l-hâl: Mehmed Çavuş b. Ali, Ali b. Abdullah, Yusuf b. Abdullah, Hasan Bey b. Hamza, Hüseyin Bey b. el-Hâc Mehmed, es-Seyyid Halil Çelebi b. es-Seyyid İbrahim, Seyfullah b. Ahmed ve gayruhüm.