Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 123 Hüküm no: 87 Orijinal metin no: [27a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kadri Çelebi’nin mirasına el koyan kardeşi Ayşe bt. Mehmed’in varis olan hanımı Âbide bt. Âbidin’e hakkını vermesi gerektiği Mahrûse-i Galata’[da] Cihangir mahallesinde vefât eden Kadri Çelebi b. ( )’nin zevce-i metrûkesi Âbide bt. Âbidin nâm hâtun mahfil-i kazâda müteveffâ-yı mezbûrun li üm kız karındaşı olup muhallefâtına vâzı‘atü’l-yed olan Âişe bt. Mehmed nâm hâtun mahzarında üzerine takrîr-i da‘vâ edip bundan akdem te‘âtîsi memnû‘ olan züyûf akçe ile altın iki yüz elliye râyic iken müteveffâ-yı mezbûra on yedi bin yüz akçe ikrâz ve teslîm edip ol dahi iktirâz ve kabz [ve] tesellüm eylemiş idi hâl-i kemâl-i sıhhatinde müslimîn huzûrunda ikrâr dahi etmişdi. Altından kıymeti olan altmış sekiz aded altın ve humusân altını muhallefâtından taleb ederim, suâl olunsun dedikde gıbbe’s-suâl ve akībe’l-inkâr müdde‘iye-i mezbûreden da‘vâsına mutâbık beyyine taleb olundukda udûl-i ricâlden olup mahmiye-i Kostantıniyye’de Sultan Selim kurbunda sâkin Mustafa Çelebi b. Mehmed ve yine mahmiye-i mezbûrede Cafer Çelebi mahallesinde sâkin Ali Çelebi b. Mehmed ve mahrûse-i mezbûre Galata’da mahalle-i mezbûre Cihangir’de sâkine Şerife Atiye bt. Yusuf Ağa nâm hâtun li ecli’ş-şehâde meclis-i şer‘a hâzırûn olup gıbbe’l-istişhâd her biri edâ-i şehâdet-i şer‘iyye edip fi’l-vâki‘ müteveffâ-yı mezbûr Kadri Çelebi hâl-i kemâl-i sıhhatinde bizim huzûrumuzda zevcesi mezbûre Âbide’nin zimmetinde cihet-i karzdan on yedi bin yüz züyûf akçe hakkı vardır deyû ikrâr eyledi biz bu husûsa bu vech üzere şâhidleriz, şehâdet dahi ederiz deyû şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle oldukdan sonra mezbûre Âbide’ye meblağ-ı mezbûru küllen ve ba‘zan müteveffâ-yı mezbûrdan veya vekîlinden ahz ü kabz ve âhara havâle veyâhud hibe ve bi vechin mine’l-vücûh zimmetini ibrâ etmeyip ve meblağ-ı mezbûr mukābelesinde yedinde zimmeti olmadığına yemîn teklîf olunup ol dahi alâ vefki’l-mes’ûl yemîn billâhi’l-aliyyi’l-azîm etmeğin meblağ-ı mezbûru müteveffâ-yı merkūmun terekesinden edâya merkūme Âbide’ye tenbîh birle mâ vaka‘a bi’t-taleb ketb olundu. Fî gurreti Zilhicceti’ş-şerîfe li sene ihdâ ve hamsîn ve elf. Şuhûdü’l-hâl: Ahmed Çelebi b. Süleyman, Mustafa Çelebi el-Kadı, Receb Halîfe el-Müezzin, Halil Beşe b. Ahmed, Mustafa Bey el-Cündî, Hasan Bey b. Hamza, Hasan Bey b. Mehmed, Mahmud b. İlyas, Abdullah b. Ali, Mehmed Çavuş b. Ali.