Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 131 Hüküm no: 97 Orijinal metin no: [29b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Yusuf’un varislerinden Mustafa Yazıcı b. Şükrullah’ın diğer varisler hanımı Ayşe Hâtun bt. Ali ve utekadan Hasan Beşe b. Abdullah ile sulh oldukları Mahrûse-i Galata’da Müeyyedzâde mahallesi sükkânından olup bundan akdem medîne-i Kefe kurbunda vâki‘ Balıklağı demekle ma‘rûf iskelede vefât eden Abdullah nâm râcilin usûbet-i nesebiyye cihetinden vârisi olan Mustafa Yazıcı b. Şükrullah meclis-i şer‘-i hatîr-i lâzimü’t-tevkīrde müteveffâ-yı mezbûrun zevce-i metrûkesi Âişe Hâtun bt. Ali ve müteveffâ-yı mezbûrun utekāsından Hasan Beşe b. Abdullah mahzarında ikrâr-ı tâm ve takrîr-i kelâm edip mezbûr el-Hâc Yusuf vefât eyledikde zevcesinden gayrı vârisi olmamak zu‘muyla yeniçeri beytülmâli muhallefâtını ahz ü kabz etmiş idi lâkin beytülmâl emîninin makbûzundan mâ‘adâ hediyesi otuz guruş kıymetli iki Kelâm-ı izzet ve iki guruş kıymetli bir yük perdesi ve yedi guruş kıymetli altı aded tencere ve on guruş kıymetli on iki sahan ve iki guruş kıymetli yirmi dört çini tabak ve bir buçuk guruş kıymetli iki ibrik ve üç guruş kıymetli sekiz minder, iki güğüm ve on guruş kıymetli üç aded kaliçe ve altı guruş kıymetli iki Selânik yan keçesi ve dört guruş kıymetli altı velense ve beş guruş kıymetli dört döşek ve üç guruş kıymetli altı batman ham ipek merhûm Hasan Beşe’nin yedinde kalmışdır hâlâ verâsetim hasebiyle zikr olunan iki Kelâm-ı şerîfden ve eşyâ-i mezkûreden hissemi taleb eylediğimde mezbûrân dahi ba‘zısını ikrâr ve ba‘zısını inkâr etmekle beynimizde münâza‘ât-ı kesîre ve muhâsamât-ı şedîde vâkı‘a olmuş idi el-hâletü hâzihî beynimize muslihûn tavassut edip husûs-ı mezkûrûna beni otuz kıt‘a guruş-ı kebîre sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr otuz guruşu tamâmen yedlerinden alıp kabz eylediğimden sonra husûs-ı mezkûra müte‘allik da‘vâdan mezkûrânın zimmetlerini ibrâ-i âmm-ı kātı‘ü’n-nizâ‘ ibrâ ve iskāt eyledim mezbûr müteveffâ-yı mezkûr el-Hâc Yusuf’un muhallefâtına müte‘allik mezbûre Âişe Hâtun ile ve merkūm Hasan Beşe ile da‘vâ ve nizâ‘ım kalmadı ve bundan mâ‘adâ yine müteveffâ-yı mezbûrun utekāsından Veli b. Abdullah ve Kaytas b. Abdullah nâm kimesneler merkūm el-Hâc Yusuf’un muhallefâtından beynimizde ma‘lûm ba‘zı eşyâyı ahz ve ihfâ ettiler deyû bu ana gelince da‘vâ üzere idim hâlâ da‘vâdan ferâgat eyledim vechen mine’l-vücûh mezbûrân Veli ve Kaytas ile dahi da‘vâ ve nizâ‘ım yokdur dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Fi’l-yevmi’s-sâmin aşer min Zilhicceti’ş-şerîfe li sene ihdâ ve hamsîn ve elf. Şuhûdü’l-hâl: Mustafa Efendi b. Ali, Osman b. Ali, el-Hâc İbrahim b. Ali, Ramazan Efendi b. Mustafa el-Kadı, Hamza b. Ali, Osman b. Receb, Ramazan b. Nasuh, Mahmud b. İlyas ve gayruhüm.