Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 142 Hüküm no: 102 Orijinal metin no: [32b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil Beşe’nin kızı Rukiye’ye Osman Çelebi’yi vasî seçtiği Her birisi mahrûse-i medîne-i Galata mahallâtından Alaca Mescid mahallesinde sâkin olan udûl-i müslimînden Mehmed Efendi b. Mustafa el-İmâm, Mahmud Çelebi b. el-Hâc Hasan, Şahin Bey b. Ali ve Hasan b. Abdullah nâm kimesneler meclis-i şer‘-i şerîf ve mahfil-i dîn-i münîf el-masûn ani’t-tağyîr ve’t-tahrîfe hâzırûn olup âti’l-beyân müteveffâya deyn-i şer‘î cihetinden üç yüz akçe borcu olduğunu ikrâr eden, kaziyye-i âti’z-zikri ise inkâr eden Receb b. Mustafa nâm kimesne mahzarında, mahmiye-i Kostantıniyye mahallâtından Çırakçı mahallesi sükkânından bâ‘is-i hâze’l-kitâb Osman Çelebi b. Derviş’den sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki mahalle-i mezbûrede bundan akdem vefât eden Halil Beşe b. Ahmed nâm kimesne maraz-ı mevte yakalanıp başını ölüm yastığına koyduğunda bizim yanımızda ve katımızda müdde‘î-i merkūmu vasiyyetlerinin tenfîzine ve Rukiye nâm sagīre kızının tesviye-i umûruna vasiyy-i muhtâr kıldı. Mezbûr Osman Çelebi de vesâyet-i merkūmeyi kabûl edip hizmet-i lâzımesini edâyı müte‘ahhid oldu. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın mûcebince hükm edildi. Cerâ zâlike ve hurrire fi’l-yevmi’s-sâlis ve’l-ışrîn min Zilhicceti’ş-şerîfe sene ihdâ ve hamsîn ve elf. Şuhûdü’l-hâl: Osman Beşe er-Râcil, Ali Beşe b. Mehmed er-Râcil, Hasan Beşe er-Râcil, Mustafa Yazıcı b. Receb, Haydar b. Abdullah, Mahmud b. İlyas