Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 142 Hüküm no: 103 Orijinal metin no: [32b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil Beşe’nin Gürcü asıllı kölesini azat ettiği Medîne-i Galata kassâm-ı askerîsi el-fakīr ileyhi sübhânehû Mehmed’in nevbetinde yazıldı. -ufiye anhümâ- (Mühür) Mehmed b. ( ) nâm râcil ve Âişe Hâtun bt. Hasan ve Sâliha bt. Abdullah nâm iki hâtun meclis-i şer‘-i şerîf ve mahfil-i dîn-i münîf el-masûn ani’t-tağyîr ve’t-tahrîfe hâzırûn olup, mahmiye-i Galata mahallâtından Alaca Mescid mahallesinde sâkin iken bundan akdem fevt olan Halil Beşe’nin Rukiye nâm sagīre kızına vasiyy-i muhtâr olan Osman Çelebi b. Derviş ve müteveffâ-yı mezbûrun annesi Âişe Hâtun bt. Musa nâm âti’z-zikr âzâd ikrârını inkâr eden hasmeyn-i câhideyn mahzarında, hâmilü hâze’l-kitâb orta boylu, elâ gözlü, sağ kaşı üzerinde eser-i cerh bulunan Gürciyyü’l-asl Kenan b. Abdullah’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müteveffâ-yı mezbûr hâl-i hayâtı ve zamân-ı nefâz-ı tasarrufâtında kendisine rıkkını mu‘terif olan müdde‘î-i mezbûr abd-i memlûkü Kenan’ı âzâd etti. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın mûcebince hükm edildi. Abd-i mezbûr bu sûretle sâir ahrâr-ı asliyyîn-i mükellefîn gibi hür oldu. Mevâlînin utekā üzerinde şer‘an sâhib oldukları hakk-ı velâdan gayrı üzerinde kimesnenin bir hakkı kalmadı. Cerâ zâlike ve hurrire fi’l-yevmi’s-sânî min Muharremi’l-harâm sene isneyn ve hamsîn ve elf. Şuhûdü’l-hâl: Şahin Beşe b. Ali, Ali Reis b. Ömer, Haydar Ağa b. Abdullah, Mahmud b. İlyas, el-Hâc Yusuf b. el-Hâc Ali, Ahmed b. Ali ve Hasan b. Mehmed ve gayruhüm mine’l-hâzırîn.