Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 154 Hüküm no: 118 Orijinal metin no: [36a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Şükrü b. el-Hâc Yakub’un oğlu Hasan’ın muhallefât konusunda Müyessere bt. Zeyneddin’e muârazan men edilmesi Mahmiye-i Galata müzâfâtından olup kasaba-i Tophâne mahallâtından Muhyiddin Efendi mahallesi sâkinlerinden iken bundan akdem vefât eden el-Hâc Şükrü b. el-Hâc Yakub nâm müteveffânın sulbî kebîr oğlu Hasan nâm emred-i bâliğ meclis-i şer‘-i hatîr-i lâzimü’t-tevkīrde müteveffâ-yı mezbûrun zevce-i metrûkesi bâ‘isetü’l-kitâb Müyessere bt. Zeyneddin mahzarında takrîr-i da‘vâ edip babam müteveffâ-yı mezbûrun muhallefâtından defter-i kassâmdan hâric on iki Mısır çarşafı ve dokuz tülbent ve dokuz sahan ve on iki Mısır alacası ve sâir ba‘zı eşyâyı ketm ve ihfâ eylemişdir, suâl olunup bi tarîki’l-irs bana isâbet eden hakkım alıverilmesin taleb ederim dedikde gıbbe’s-suâl mezbûre Müyessere defter-i kassâmdan hâric zikr olunan eşyâyı ve sâir ba‘zı eşyâ ketm ve ihfâ eylemedim deyû münkire olup ve merkūm Hasan’dan sıdk-ı makāline beyyine taleb olundukda ikāmet-i beyyineden âciz ve kāsır olup istihlâf eylemeğin müteveffâ-yı mezbûrun muhallefâtından on iki Mısır çarşafı ve dokuz tülbent ve dokuz sahan ve on iki Mısır alaca ve sâir ba‘zı eşyâ ketm ve ihfâ eylemediğine mezbûre Müyessere yemîn billâhi’l-aliyyi’l-a‘lâ eyledikden sonra merkūm Hasan mu‘ârazadan men‘ birle gıbbe’t-taleb ketb olundu. Hurrire fi’l-yevmi’s-sâmin ve’l-ışrîn min Muharremi’l-harâm li sene isneteyn ve hamsîn ve elf. Şuhûdü’l-hâl: El-Hâc Musa b. İbrahim, el-Hâc Osman b. el-Hâc Şaban, Ebûbekir Dede b. Mustafa el-Kayyım, el-Hâc Mehmed b. Mehmed, İbrahim Halîfe b. Receb, Abdülkādir b. Receb.