Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 164 Hüküm no: 127 Orijinal metin no: [38a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Çelebi’nin Emir Ali Çelebi b. İsmail’in oğlu ve varisi olduğu Mahmiye-i Galata’ya tâbi‘ kasaba-i Kasımpaşa mahallâtından mahalle-i Câmi‘-i Kebîr sâkinelerinden ( ) bt. Abdullah nâm hâtun meclis-i şer‘-i hatîr-i lâzimü’t-tevkīrde yine mahalle-i mezbûrede sâkine iken bundan akdem vefât eden Emir Ali Çelebi b. İsmail nâm müteveffânın zevce-i metrûkesi Âişe Hâtun bt. Mustafa Efendi nâm hâtun mahzarında takrîr-i kelâm ve ta‘bîr ani’l-merâm edip müteveffâ-yı mezbûr Emir Ali Çelebi beni teserrî edip işbu râfi‘ü’l-vesîka Hasan Çelebi benden tevellüd edip mezbûr Hasan Çelebi müteveffâ-yı mezbûr Emir Ali Çelebi’nin sulbî oğludur, suâl olunup tahrîr olunması matlûbumdur dedikde gıbbe’s-suâl ve akībe’l-inkâr müdde‘iye-i mezbûrenin da‘vâsına mutâbık beyyine taleb olundukda udûl-i müslimînden mahalle-i mezbûre sâkinlerinden es-Seyyid Mehmed Çelebi b. es-Seyyid Ahmed Çelebi ve es-Seyyid Mahmud Çelebi b. es-Seyyid Yusuf ve es-Seyyid Kemal b. es-Seyyid Abdi ve Abdülvehhâb b. Abdi ve el-Hâc Mustafa b. Abdi ve Ömer b. Hüseyin [38b] ve Mehmed Çelebi b. Abdurrahman nâm kimesneler li ecli’ş-şehâde hâzırûn bi’l-meclis olup gıbbe’l-istişhâd fi’l-hakīka müteveffâ-yı mezbûr Emir Ali hâl-i hayâtında ve kemâl-i akl-i sıhhatinde mersûmeye ben istîlâd etmekle mezbûr Hasan tevellüd edip benim sulbî oğlum olup vârisimdir deyû bizim huzûrumuzda ikrâr ve i‘tirâf eyledi biz bu husûsa şâhidleriz ve şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri hayyiz-i kabûlde vâkı‘a oldukda mezbûr Hasan Çelebi’nin verâsetine hüküm birle vaka‘a bi’t-taleb ketb olundu. Tahrîren fi’l-yevmi’s-sâmin ve’l-ışrîn min şehri Saferi’l-hayr. Şuhûdü’l-hâl: Mahmud Kapudân b. Şaban, İbrahim Çelebi b. el-Hâc Fazlı, Abdurrahman b. Abdurrahman, el-Hâc Abdi b. Ahmed, İbrahim b. Ahmed, Yusuf Çelebi b. Mehmed.