Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 165 Hüküm no: 128 Orijinal metin no: [38b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Ahmed’in câriyesi Mülâyim bt. Abdullah’ı azat etmiş olduğu Mahmiye-i Galata tevâbi‘inden kasaba-i Tophâne’de mahalle-i Mustafa Ağa sâkinelerinden Fâtıma bt. Ahmed nâm hâtun tarafından husûs-ı âti’l-beyânı ikrâra vekîl olup vekâleti ber nehc-i şer‘î sâbite olan zevci Ahmed Çelebi b. Hasan nâm kimesne meclis-i şer‘-i hatîr-i lâzimü’t-tevkīrde işbu râfi‘atü’l-kitâb orta boylu gözleri mutavvele Abaziyyetü’l-asl Mülâyim bt. Abdullah nâm hâtun mahzarında bi’l-vekâle ikrâr ve i‘tirâf edip mezbûre Mülâyim müvekkilem mersûme Fâtıma’nın câriye-i memlûkesi olup müvekkilem mezbûre Fâtıma merkūme Mülâyim’i hasbeten lillâhi’l-aliyyi’l-azîm ve taleben li merzâti Rabbihi’l-kerîm cemî‘ mâlından âzâd edip üzerinde hakk-ı velâdan gayrı hakkı kalmayıp ba‘de’l-yevm mezbûre Mülâyim sâir harâir-i asliyyât gibi hürre olsun dedikde vekîl-i merkūm Ahmed Çelebi’nin vech-i muharrer üzere cârî olan kelâmını mezbûre Mülâyim bi’l-muvâcehe tasdîk ve bi’l-müşâfehe tahkīk edicek, merkūme Mülâyim’in ıtkına hüküm birle mâ vaka‘a bi’t-taleb ketb olundu. Hurrire fi’l-yevmi’s-sâmin ve’l-ışrîn min şehri Rebî‘ilevvel li sene isneteyn ve hamsîn ve elf. Şuhûdü’l-hâl: Hızır Efendi b. Kemal el-İmâm, Halil Çelebi b. Hızır el-Müezzin, el-Hâc Receb b. Kenan, Mehmed Bey b. Yusuf, el-Hâc Ali b. Abdullah, Mahmud Dede b. Veli, Osman Bey b. Abdullah.